Siglir tar il cuntegn

Header

cuntegn

Privel da stretga d'energia Nagina patinera sin la Quaderwiese a Cuira

La citad da Cuira ha decis preventivamain da betg installar la patinera mobila sin la Quaderwiese. La raschun saja la crisa d'energia che smanatscha, scriva il Cussegl da citad en ina communicaziun. La ristga saja memia gronda dad eventualmain stuair serrar anticipadamain la patinera sin cumond da la Confederaziun. Sulettamain installar e puspè deinstallar custia in mez milliun francs. Latiers vegnian ils pretschs per la forza electrica che sajan fitg auts. Las surfatschas da glatsch als implants da sport Obere Au èn però avertas sco planisà davent dals 24 d'october.

Fondo per stretgas tras corona vegn schlià

La citad da Cuira ha plianvant decidì da schliar ses fondo creà per sustegnair firmas cun consequenzas negativas tras la pandemia da corona. L'avrigl 2020 aveva la citad creà il fondo cun in capital dad 1 milliun francs. E fin ussa sajan 52 da 105 dumondas per sustegn vegnidas concedidas. Uschia hajan ins pajà ora bun 300'000 francs. Il dumber da las dumondas saja però sa reducì permanentamain – surtut suenter che las mesiras extraordinarias èn vegnidas schliadas, communitgescha la citad. Perquai vegnia il fondo sco previs schlià cun la fin da l'onn 2022.

Entant possian ins però anc dumandar sustegn dal fondo enfin ils 15 d'october.

RTR novitads 17:00

Artitgels legids il pli savens