Siglir tar il cuntegn
Inhalt

Grischun Prima badigliada per colliar Sedrun ed Andermatt

Cun la prima badigliada per ina nova sutgera ha cumenzà la colliaziun e sanaziun dals territoris da skis Andermatt e Sedrun, quai communitgescha la Andermatt Swiss Alps. La nova sutgera da 6 sur 900 meters tranter Gurschen e Gurschengrat custa 7 milliuns francs.

La legenda da skis d'Andermatt Bernhard Russi e l'investider egipzian Samih Sawiris.
Legenda: La legenda da skis d'Andermatt Bernhard Russi e l'investider egipzian Samih Sawiris tar la badigliada. mad

L’avertura da quella è planisada per la stagiun che vegn. La sutgera è l’emprima da tut en tut 14 sutgeras dal project da sanaziun per l’arena da skis Andermatt-Sedrun. Ils dus terrotoris da skis ch’èn separads tras il pass da l’Alpsu vegnan colliads pervi dal ressort da turissem da l’investider egipzian Samih Sawiris.

Investiziuns da 130 milliuns francs

La Andermatt-Sedrun Sport SA, ina societad affiliada da la Andermatt Swiss Alps, planisescha ils proxims 3 enfin 4 onns investiziuns da 130 milliuns francs per ils dus territoris en il Grischun e l’Uri. Quels duain crescher sin passa 120 kilometers pista ed uschia daventar il pli grond territori da skis da la Svizra centrala.

Oriundamain eri previs ch’il territori daventia anc pli grond. Pervi da la critica da las organisaziuns da l’ambient han ils responsabels però stuì redimensiunar il project.

RR novitads 15:00