En il territori da skis a Mustér n'è la pista fin a val betg charrabla. «Igl è memia chaud ed igl ha bler memia pauca naiv», di Stefan Arnold il directur da las Pendicularas. Dapli quitads ad el fa però il quint d'electricitad. Ils proxims dus onns paja Mustér danovamain tariffas set giadas pli autas che fin ussa. «Nus avain gì in contract sur plirs onns cun bunas cundiziuns. Ussa avain nus simplamain gì discletg», di Stefan Arnold envers la «Rundschau» dad SRF. Las pendicularas ston ussa spargnar electricitad: Sco mesira van ils runals per part pli plaun.
Ils tickets vegnan pli chars
Pervia da las tariffas pli autas quintan las pendicularas da Mustér per questa stagiun cun ina perdita dad 800'000 francs. Ils pretschs han els fingià fixà il mars passà. Malgrà ils custs supplementars na datti nagin augment da pretschs. Mo «La proxima stagiun na pudain nus betg evitar in augment dals pretschs», di il president dal cussegl administrativ Marcus Weber. Han las pendicularas pia calculà fauss tar ils contracts? «Na», di Weber, «da stad èn ils pretschs stads essenzialmain pli auts.»
Spetgà fin avant Nadal
Era las pendicularas Claustra-Madrisa han l'onn passà ad uras fatg stentas per in nov contract per electricitad. «Avessan nus suttascrit la stad, pajassan nus ussa nov giadas il pretsch vegl», di Roger Kunz, co-mainafatschenta da las pendicularas Claustra. Els han dentant spetgà e pir suttascrit curt avant Nadal in nov contract per ils proxims tschintg onns. Il pretsch: 23 raps per ura kilowatt. Quai è trais e mez giadas tant sco avant. Or da vista d'economia da manaschi as possia supportar quai, di Roger Kunz. I saja stà ina decisiun raschunaivla. Pajar otg giadas u dapli fiss stà problematic. Er Claustra prenda mesiras per spargnar electricitad: Tar ina frequentaziun bassa van ils runals pli plaun, ils temps da manaschi èn vegnids adattads ed il stgaudament dals sezs deactivà.