Plazza Arcas Cuira - In'ura da sulegl cun dus temps e data
Cun l'expert dad uras da sulegl Claudio Abächerli avain nus visità in'ura tut speziala. Ella è sin il plaz da l'Arcas en la citad veglia da Cuira. Betg mo las uras, mabain era la data po ella inditgar.
L'ura da sulegl sin la plazza Arcas è vegnida construida l'onn 1982. Ella saja fetg moderna, di l'amatur d'astronomia Claudio Abächerli. L'ura mussa il temp però mo tranter las 12:00 e las 20:00. Quai perquai ch'il sulegl traglischa pir davent da mezdi la fassada ch'è drizzada en direcziun vest.
1 / 3
Legenda:
L'ura da sulegl sa chatta en la citad veglia da Cuira.
mad
2 / 3
Legenda:
L'ura da sulegl mussa las 12:58
La sumbriva dal sulegl mussa curt avant las 13:00 – lain dir las 12:58 . Quai vesan ins vid la lingia cotschna. Per chattar las uras correctas ston ins anc guardar sin la grafica da correctura sin il proxim purtret.
mad
3 / 3
Legenda:
Cun correctura di l'ura da sulegl las 13:03
Nus avain visità l'ura da sulegl ils 5 d'avust 2021. La correctura per quest di munta a circa +5 minutas. Quai vul dir: Las 12:58 + 5 min = 13:03.
mad
Las atgnadads da l'ura: 2 temps e la data
Las bleras uras da sulegl inditgeschian il temp local, di Claudio Abächerli che abitescha en il Vallais en ha ragischs en il Mesauc. Auter è quai tar quest'ura: Ella mussa era il temp europeic central. Vul dir: il temp che nus vesain sin l'ura da bratsch u il telefonin. Sulettamain, cura ch'igl è mezdi, inditgescha il pendel mellen malegià vid la paraid anc las uras localas. Quai munta en il cas da Cuira circa las 12:22.
Legenda:
Il pendel malegià vid la paraid mussa il temp local da Cuira
Cura che l'ura mussa las 12:00 inditgescha il pendel mellen il temp local da Cuira: circa las 12:22. Quai perquai che Cuira sa chatta en il vest dal meridian ed il sulegl dovra circa 22 minutas enfin ch'el cuntanscha il pli aut punct sur Cuira.
mad
Betg mo 2 temps – era la data
Il rudè ch'è da la vart dretga da l'ura mussa en cifras romanas ils mais schaner enfin december. Sin la lantschetta sa chattan duas cullas che na tutgan dentant betg l'ina l'autra.
Legenda:
L'ura da sulegl inditgescha era la data
Cun agid dal rudè blau, las lingias finas nairas e la sfessa tranter las cullas da la lantschetta chatt'ins la data.
mad
Las lingias finas e nairas inditgeschan la midada dal mais e quai capita adina il 23avel di dal mais (lu mida era l'ensaina). Sco la fotografia sura mussa, inditgescha la segunda lingia naira da sut ensi il mais 5 (pia il matg) ed il mais 7 (pia il fanadur). La sumbriva da la sfessa tranter quellas duas cullas sa chatta in pau pli aut che la segunda lingia naira da sut ensi (fotografia sut). Quai munta che nus essan circa 10 dis davent dals 23 da fanadur e quai constat uschia circa cun ils 5 d'avust.
Legenda:
La sumbriva da las cullas sin la lantschetta
La sumbriva da la sfessa tranter las duas cullas inditgescha la data. La sumbriva sa chatta in zic sur la segunda lingia da sut ensi. Uschia constati cun ils 5 d'avust.
mad
