Pendicularas Grischun: sulet sbassar ils pretschs na va betg

La branscha da pendicularas è innovativa, dentant vulan memia blers en la direcziun sulet sbassar ils pretschs.

Martin Hug president pendicularas Grischun.

Legenda da maletgs: Martin Hug president pendicularas Grischun. mad

L'Uniun pendicularas Grischun na po betg influenzar ils pretschs che las pendicularas pretendan. Rabat sin cartas dal di, uffants che pon ir gratuit cun skis u era pre-venditas cun pretschs da dumping, quai sajan tut models che provocheschian – cunzunt la concurrenza. Uschia mettian las pendicularas ina l'autra sut squitsch, uschia Martin Hug il president da l'Uniun pendicularas Grischun.

Far empaglia in l’auter

Hug mira cun quitads sin quest svilup. El na veglia betg sentenziar quels che dattan tals rabats, i fissi dentant pli impurtant da daventar pli curaschus e chattar soluziuns novas. Sulet sbassar il pretsch na portia betg dapli skiunz. Sbassar ils pretschs da malaura sco exempel pudess funcziunar, ma lura stoppian ins era pudair auzar ils pretschs da bell’aura, uschia Hug.

Branscha vegn en moviment

Quai che schabegia il mument saja bun, perquai che la branscha vegnia en moviment. Ins na dastga dentant betg vegnir en la situaziun che las marschas daventian uschè pitschnas ch'ins na possia betg pli far las investiziuns necessarias, uschia Hug. Ma sco president stoppia el era conceder, ch'el n'haja betg la survista sur da tuttas ideas novas per rabats e purschidas che vegnan sin il martgà.

RR actualitad 12:00