L'uffizi federal gioga la rolla d'arbiter e quai schebain che questa rolla è sa midada dapi la nova lescha dal 2007, manegia Jordan. Savens vesia l'uffizi incumbensas che na tutgan betg tar el e che chaschunian magari fitg auts custs.
Rinforzar questas pitgas ha custà 1,7 milliuns francs ed i na fa betg senn. Quai fertant ch'auters stabiliments avessan urgent basegn.
Exempel Diavolezza
Tar ina renovaziun vid la pendiculara Diavolezza il 2012 avevan els planisà da remplazzar las cabinas e far pitschnas midadas vid las staziuns a val ed a culm. L'Uffizi federal da traffic haja lura dentant anc gist pretendì d'adattar la pendicularas a novas normas. Enfin là tegnevan las pendicularas frunt a vents d'enfin 250 kilometers l'ura, la nova norma pretenda 300 kilometers l'ura. Tenor Jordan ina farsa, pertge gia tar vents sur 120 kilometers l'ura na sajan nagins giasts pli en il territori. Ils custs supplementars tar quai project e questa midada haja custà 1,7 milliuns francs.
Via giuridica e politica
Adrian Jordan ed auters collegas da la branscha (Laax e Zermatt) han rimnà ensemen cun l'uniun tetgala divers exempels. Cun quels van els la via giuridica cunter l'Uffizi federal da traffic. Ma era la via politica vulan els ir per meglierar la situaziun. Els sajan gia en contact cun divers parlamentaris a Berna per pudair far squitsch politic. Avant vulan els dentant anc ina giada tschertgar il discurs cun l'uffizi federal.
Nagina posiziun da l'uffizi federal
Tar l'entira tematica e tar las reproschas concretas n'ha l'uffizi federal betg vulì prender posiziun. Ina dispita publica na portia nagut. L'uffizi ha sulettamain pronunzià, ch'el fetschia valair las prescripziuns e las normas internaziunalas.
RR novitads 12:00