La Procura publica dal Grischun ha avert in'inquisiziun penala cunter las pendicularas d'Arosa, quai mussan retschertgas dal schurnal regiunal da SRF. I va per sclerir sche la pratica da regalar abunaments da stagiun, en la valur da 550 francs, a politicras e politichers locals è legala.
Concret vai per examinar sche questa pratica cuntrafa a la concessiun d'avantatg (mögliche Vorteilsgewährung). L'expert per dretg penal da corrupziun e manader da fatschenta da Transparency International Svizra Martin Hilti di, ch'i pudess en quest cas esser il privel che las persunas ch'han survegnì il regal n'èn betg pli nunpartischantas.
Gia sche politicras u persunas da l'administraziun paran d'esser partischantas, fa quai donn a la democrazia. Gia uschia patescha fidanza da la populaziun en lur integritad.
Far e prender encunter regals è schon pussaivel. Tenor Martin Hilti metta il dretg penal in cunfin maximal da 100 enfin 300 francs. I valia dentant adina da giuditgar da cas tar cas. La Procura publica dal Grischun na prenda betg posiziun tar cas currents.
Pratica dapi 58 onns
L'inquisiziun penala è averta encunter il manader da fatschenta da las pendicularas d'Arosa sco er cunter il president dal cussegl d'administraziun Lorenzo Schmid. Lez ha prendì posiziun a scrit vers RTR:
Nus na prendain da princip betg posiziun areguard la procedura currenta. Nus rendain attent ch'i vala la presumziun d'innocenza e che nus essan persvas d'avair agì tenor la lescha. Perquai avain nus agì tenor la pratica che vala dapi 58 onns.
Dapi 58 onns regalan las pendicularas d'Arosa abunaments a politicras e politichers locals. Questa pratica era vegnida publica avant in onn e mez en la gasetta Südostschweiz. Quai suenter ch'in parlamentari aveva crititgà la pratica da regalar abunaments. I vala la presumziun d'innocenza.