Ovras electricas Hinterrhein: Festa per la fin da la renovaziun

La renovaziun totala dals implants da las ovras electricas Hinterrhein SA è terminada. Dapi la fin d'avust èn tut ils implants puspè en funcziun ed ils custs da 300 milliuns francs èn tegnids en, uschia communitgeschan las ovras electricas Rain posteriur.

Gia il 2005 han ils responsabels fatg ponderaziuns davart ina sanaziun cumpletta, il 2011 han cumenzà las emprimas lavurs. En tut eran radund 50 interpresas participadas vid il project. Dal temp cun la pli auta activitad da lavur han radund 300 persunas lavurà il medem mument vid la renovaziun.

La sanaziun ha cumpiglià la svidada dals dus lais da fermada e la revisiun dals indrizs da segirezza. Er cumpigliada era la sanaziun dals foss da pressiun, la renovaziun da la protecziun cunter corrusiun e la revisiun da tuttas turbinas. L'equipament electronic è vegnì remplazzà e la tecnica da manar è vegnida renovada.

Cun ils novs cundrizs po l'ovra electrica porscher dapli electricitad. Quella tanscha per proveder cumplettamain l'entir territori da Valragn, Avras e Tusaun.

RR novitads 15:00/07:10