Siglir tar il cuntegn

Header

video
LR. ha plans concrets per salvar medias rumantschas
Or da Telesguard dals 11.10.2018.
laschar ir. Durada: 1 minuta 54 Secundas.
cuntegn

Grischun Nova fundaziun duai salvar las medias rumantschas

«Medias rumantschas 2019» ha preschentà ses concept per mantegnair medias rumantschas en l'avegnir. Cun ina nova fundaziun, FMR (fundaziun medias rumantschas), duaja vegnir collavurà meglier surregiunal e concentrar las forzas sut in chapi.

Ina gruppa da lavur sut la batgetta da Martin Gabriel, secretari da la Lia Rumantscha, ha elavurà in project davart il futur da las medias rumantschas. Quel è vegnì approvà dal Uffizi federal da cultura. Uss po cumenzar la elavuraziun dal project.

Nova fundaziun FMR (fundaziun medias rumantschas)

En sasez ha la nova fundaziun FMR ina funcziun sumeglianta sco l'agentura da novitads ANR fin qua. La nova fundaziun duaja dentant metter sut in tetg tut las medias da print rumantschas. Era l'ANR fiss lura part da la fundaziun FMR.

La nova idea è da metter l'entira part da print da las medias rumantschas sut in tetg.
Autur: Martin Gabriel manader da la gruppa da project «Medias Rumantschas 2019»

La finamira saja tranter auter da meglierar da collavuraziun tranter las gasettas existentas, pia tranter La Quotidiana, la Posta Ladina e la Pagina da Surmeir.

audio
Saira: Nova fundaziun FMR duai salvar medias rumantschas
ord Actualitad dals 11.10.2018.
laschar ir. Durada: 2 minutas 17 Secundas.

Per finanziar la nova fundaziun dovrian ins in milliun francs dapli che tochen uss (pia radund il dubel). Quels daners duajan vegnir per radund 60% da la Confederaziun, ils ulteriurs 40% dal chantun grischun.

Nus avain effectiv fatg quella pretensiun, perquai ch'i duvrass quai. Ins sto dentant er esser realistic. Forsa survegnan ins mo la mesadad e lu ston ins adattar ils plans.
Autur: Martin Gabriel secretari da la Lia Rumantscha
Martin Gabriel avant camera
Legenda: Martin Gabriel, manader da la gruppa da project «Medias Rumantschas», ha infurmà davart il concept. RTR, Pietro Jacomet

Medema frequenza – meglra qualitad

Uschè bain La Quotidiana (tschintg giadas ad emna), la Posta Ladina (trais giadas ad emna) sco era la Pagina da Surmeir (ina giada ad emna) vegnissan tenor il concept publitgadas tuttina savens sco fin uss. Mumentan na saja betg planisà da chalar da distribuir las gasettas sin palpiri. Sin l'emprima egliada na sa midia pia betg bler per il consument. Percunter duaja la qualitad dals artitgels sa meglierar ed ils temas da las gasettas vegnir pli vasts.

Pli stretga collavuraziun cun RTR

Tranter la nova fundaziun FMR ed RTR duaja dar ina collavuraziun pli stretga.

La collavuraziun è davent da l'entschatta vegnida declerada sin il sectur da cuntegns e da coordinaziun.
Autur: Martin Gabriel secretari da la Lia Rumantscha

Uschia duai la scolaziun schurnalistica per exempel vegnir coordinada. Plinavant propona il concept ina infrastructura dad IT ed ina datoteca da maletgs communabla. Ins na sappia dentant anc betg concret co la collavuraziun vegnia a vesair ora. Uschè u uschia dovria quai anc ina soluziun optimala per la collavuraziun ch'è cumpatibla cun l'incumbensa da prestaziun da la SRG SSR.

Co vinavant?

La dumonda essenziala resta vinavant quella da las finanzas. En in emprim pass stoppia la collavuraziun tranter FMR e RTR vegnir sclerida. Suenter stoppia in gremi da tut ils partenaris definir las proximas finamiras.

RR actualitad 17:00

Artitgels legids il pli savens