La neofita, ina planta betg'indigena, crescha fitg spert e la feglia vegn per part extrem gronda. Gist quai è er il problem: Sche la neofita sa derasa, fa la feglia in tetg cumpact che dat sumbriva ed impedescha la creschientscha da plantas indigenas che dovran glisch. Ruvers, ischis da muntogna e larschs n'han uschia nagina schanza da crescher.
«Anc mai vis talas dimensiuns»
En talas dimensiuns sco en l'enclar a Malans n'haja el anc mai vis la neofita, di Marco Vanoni da l'Uffizi chantunal per guaud e privels da la natira. En il sid dal chantun, a San Vittore sin il cunfin cun il Tessin, dettia però grondas populaziuns. En il nord dal chantun saja la planta anc rara. Qua dettia ella en lieus singuls, nua che la neofita saja sa derasada or dad ierts privats en il guaud.
Per che la neofita na prendia betg surmaun sin la runca a Malans, vegnan las plantas stratgas ora rigurusamain. La populaziun deriva dad ina gronda planta mamma ch'è creschida là e ch'è vegnida uschè veglia ch'ella ha bittà sems. Ins ha bain cumbattì la planta mamma, ma ils scherms creschan uss ad in crescher. Ed il problem vegnia er anc ad occupar els in mument, perquai ch'ils sems possian durmir en il terren fin otg onns e lura pir pruir, di il selvicultur da revier Manuel Hasler.
Igl è impurtant d'infurmar la populaziun, tge che po schabegiar, sch'ina neofita sa derasa nuncontrolladamain.
Cumbat impurtant
Cunquai ch'ins ha allontanà rigurusamain tut las plantas en l'enclar, èn ins da buna speranza ch'il cumbat cunter la neofita haja success. Sch'i gartegia dad impedir la derasaziun a Malans, po quai er esser impurtant per il rest dal Grischun, perquai che la neofita na vegn betg da sa derasar vinavant.