Siglir tar il cuntegn

Header

audio
Stan da fugitivs en Grischun suenter 6 mais guerra en l'Ucraina
Or da Actualitad dals 24.08.2022.
laschar ir. Durada: 3 minutas 6 Secundas.
cuntegn

Migraziun en Grischun Situaziun d'asil en cifras e graficas

La guerra en l'Ucraina senta er il Grischun: Cumpareglià cun ils ultims onns èn puspè dapli persunas sin la fugia. La gronda differenza: Las bleras persunas ucranaisas han chattà in suttetg en abitaziuns individualas u tar privats. Ina survista da las cifras actualas.

L'Uffizi da migraziun dal Grischun è responsabel per dar in suttetg a persunas che dumondan per asil sco er a requirents d'asil. Dapi la guerra en l'Ucraina vegnan persunas cun il status spezial vitiers, l'uschenumnà status S.

Il mument sa tracti tar radund mintga segunda persuna che figurescha aifer las structuras da l'Uffizi chantunal per migraziun d'ina persuna cun il status S. Pia: Radund 2'500 persunas sa chattan en las structuras da l'uffizi da migraziun. Las cifras exactas per la fin da fanadur 2022:

  • 203 persunas che dumondan per asil
  • 1'052 fugitivs admess provisoricamain
  • 1'245 persunas cun status S

La gronda differenza da persunas cun il status S è ch'ellas han il pli savens lur suttetg en abitaziuns individualas u tar privats. Gnanc 20% dorman il mument en in alloschi collectiv dal chantun (stan 22 d'avust 2022).

Anc hai plaz, ma quel dovri

Il mument èn ils alloschis collectivs dal chantun occupads per 56%, sco l'uffizi per migraziun ha ditg sin dumonda (stan 22 d'avust 2022). En vista a l'atun na tanscha quai però betg. Il Secretariat da stadi per la migraziun quinta enfin l'atun cun 100'000 fin 120'000 persunas cun status S en Svizra. Per il Grischun munta quai ch'i dovra tut en tut 3'500 plazs, 2'000 da quels en alloschis collectivs.

Tgi èn las persunas cun status S?

Avrir la box Serrar la box
  • En Grischun vivan 1'471 persunas cun status S. 65% dunnas, 35% umens.
  • Radund in terz da las persunas cun status S èn uffants (486 uffants tranter 0-14 onns)
  • 166 giuvenils e giuvens creschids tranter 15 e 24. En questa vegliadetgna èn 58% dunnas.

(stan 22 d'avust 2022)

Tgi va a scola ...

Uffants ch'han il status S han il dretg dad ir a scola. Avant las vacanzas da stad gievan radund 200 uffants a scola en 52 differentas scolas en il Grischun. Cun l'entschatta dal nov onn da scola èsi garantì che tuts uffants pon ir a scola, ha sincerà Marcel Suter, il manader da l'uffizi per migraziun. Cifras actualas en quest connex suondan. En ils alloschis collectivs a Cuira, Giuvaulta e Trimmis datti scolas supplementaras.

Mintga uffant ha in plaz en scola. Saja quai en las scolas en las vischnancas u en scolas dals centers d'asil.
Autur: Marcel Suter manader uffizi per migraziun

... e tgi lavura

Il spezial vid il status S è che quel permetta da s'integrar en il martgà da lavur. En il Grischun lavuran il mument 143 persunas, la plipart en la gastronomia u hotellaria. Ulteriuras 32 persunas èn a la tschertga da lavur ed èn annunziadas tar ils differents centers regiunals per intermediaziun da lavur (RAV).

Dapli migraziun – dapli persunal

Per dar dumogn a tut las sfidas che sa dattan entras l'augment ha l'Uffizi per migraziun chantunal engaschà 44 persunas. Tar dapli che la mesadad sa tracti da scolastas u scolasts. L'ulteriur persunal surpiglia lavurs da cussegliaziun u d'administraziun. En pli haja er l'Uffizi social augmentà il dumber da persunal per l'ina per l'alloschament individual sco era per il servetsch social regiunal.

Per dar suttetg als fugitivs da l'Ucraina ha il chantun mess a disposiziun plirs alloschis ubain puspè nizzegià structuras existentas.

Regiun Malögia tschertga nov alloschi

Sur ils mais da stad ha in hotel a San Murezzan mess a disposiziun las localitads per 50 fugitivas e fugitivs. Per la stagiun d’enviern turna l’hotel però puspè tar sia funcziun oriunda. Perquai scada il contract d’alloschament per las fugitivas ed ils fugitivs ed i basegna ina schliaziun per l'entira gruppa.

audio
Regiun Malögia tschertga alloschis per fugitivs d'Ucraina
ord Actualitad dals 24.08.2022.
laschar ir. Durada: 2 minutas 24 Secundas.

Il stab directiv da la regiun Malögia tschertga actualmain alternativas – chombras dublas ubain abitaziuns. Sco Andrea Gilli, il president da la regiun Malögia di, saja impurtant da chattar albierts al medem lieu. Las persunas pertutgadas sajan numnadamain sa disadas vid la situaziun ed ils uffants van a scola a San Murezzan. Uschia na veglian ins betg puspè dischlocar famiglias ucranaisas e chattar ina schliaziun en la regiun.

RTR actualitad

Artitgels legids il pli savens

Scrollar a sanestra Scrollar a dretga