Siglir tar il cuntegn
cuntegn

Grischun Migrants da tgira - era en il Grischun

Ir en chasa da vegls u star a chasa? Questa dumonda occupescha bain bleras persunas veglias. In'opziun è dentant er d'engaschar migrants da tgira che guardan da glieud veglia. Savens derivan quels da pajais da l'ost.

Chasarina che tegn dunna pli veglia.
Legenda: Chasarinas dastgan er sustegnair las persunas veglias, na dastgan dentant betg far tractaments medicinals. Keystone

Tar ils migrants da tgira stoppian ins differenziar, declera Paul Schwendener, manader da l'Uffizi per industria, mastergn e lavur. I dettia migrants da tgira en il sectur da tgira medicinala u en il sectur da tgira da chasa - ergo chasarinas. Sin il sectur da la tgira medicinala na dettia il mument anc nagins migrants da tgira.

Spitex è sviluppada bain

I saja plitost chasarinas che sustegnian glieud veglia en lur mintgadi. E quellas na dastgan betg far tractaments medicinals sco dar sprizzas, midar faschas u mesirar la pressiun dal sang.

Paul Schwendener.
Legenda: Paul Schwendener, manader da l'Uffizi per industria, lavur e mastergn. RTR, G. Gabriel

«Quai ha da far cun il fatg che nossa Spitex saja sviluppada fitg bain e surpiglia questas prestaziuns da sanadad.» Tge lavurs ch' ina tala chasarina dastga far u tge che vala sco tgira medicinala - quai è tenor Schwendener discutabel. «I dat qua ina zona grischa», conceda el. Trair en la persuna u gidar da sa lavar na sajan cleramain anc betg prestaziuns medicinalas.