Il med d'instrucziun «Mediomatix» è vegnì creà da differentas gruppas da lavur – cunzunt da scolastas e scolasts – e cumpiglia en tut 256 cudeschs. 4 cudeschs da lavur per mintga classa, commentaris per las persunas d'instrucziun ed ina grammatica en mintga idiom: sursilvan, sutsilvan, vallader e puter.
Sumegliant ma tuttina different
Ins ha vulì crear in med d'instrucziun ch'è sumegliant en tut ils idioms, ma che tracta tuttina las atgnadads regiunalas ed idiomaticas. Quai saja era stà ina da las grondas sfidas, di il mainaproject Rico Cathomas.
L'usit da Chalandamarz n'avain nus betg tematisà en il cudesch per sursilvan – tar lez faschessi plitost senn da menziunar il Trair schibettas u insatge sumegliant
In avantatg da quest med da scola saja era ch'i dettia el sin palpiri, ma era digital. Uschia saja pli simpel da far adattaziuns, di Rico Cathomas. Per che la versiun squitschada saja uschè sumeglianta sco la digitala, squitschia il chantun be ina pitschna quantitad a la giada.
Era per surmiran
Quest onn duai il med d'instrucziun per la segunda primara cumparair per surmiran. Sco Jon Domenic Parolini, il cusseglier guvernativ responsabel per la furmaziun ha ditg, haja il Surmeir pir da curt puspè midà davent il Rumantsch grischun tar l'idiom sco lingua d'alfabetisaziun. Perquai vegn uss era la versiun surmirana dal med d'instrucziun creada pass per pass. Rico Cathomas è segir ch'ins vegnia da far quai pli simpel, damai ch'ins possia profitar da las experientschas ch'ins ha fatg cun tschels idioms. Enfin l'onn 2029 duai il med d'instrucziun «Mediomatix» esser pront en tut ils tschintg idioms.