Rico Arpagaus ha plaschair, ch'i ha dà in pèr scrottas da naiv e che l'enviern stat avant porta. El maina la fatschenta da sport Wasescha a Savognin. Els sajan pronts per la stagiun d'enviern. Ma i ha dà in pèr sfidas. Tar la cumpra da skis, snowboards, ed equipament per ulteriur sport d'enviern hai per part dà problems. Tscherts products sajan vegnids pli tard, auters vegnan insumma betg furnids. Surtut tar las textilias haja dà intgins problems.
Quai è schon in zic ina sfida pli gronda per quest enviern.
A Glion tar la fatschenta Menzli Sport saja la situaziun differenta tar la differenta rauba, di il mainafatschenta Gian Marco Menzli. Tar tscherts segments hajan els survegnì tut l'urden empustà, tar autra rauba, sco tar ils skis da passlung e la vestgadira da skis, manchian anc intgins products.
Ins sto adina esser flexibels e guardar da pudair guntgir sin furniturs alternativs.
Sarina Vincenz da Heinrich Sport a Scuol a surtut remartgà tar la cumpra per la stagiun d'enviern, che la rauba vegn furnida pli tard. Ella è dentant betg segira sche quai saja pervia da la nova crisa, pervia dalla guerra, ubain anc pervia da la pandemia. Ma en scadin cas saja d'empustar pli baud e da quintar che la rauba vegnia pli tard ch'usità.
Fin ussa avain nus survegnì tut la rauba, en il mument guarda quai ora positiv.
Ulteriura sfida – chattar persunal
Sper las empustaziuns da rauba datti anc in problem, ch'è derasà en fitg bleras branschas. Il manco da persunal. Tut las trais fatschentas dumandadas han ditg ch'i saja grev da chattar nov persunal. Las firmas èn dentant vegnidas d'occupar tut las plazzas, quai surtut grazia a las bleras collavuraturas ed ils blers collavuraturs che lavuran gia blers onns tar las fatschentas.
