Siglir tar il cuntegn
Inhalt

Grischun La dunna misteriusa da Porchabella

Avant passa 300 onns è ina giuvna disgraziada sin il glatscher da Porchabella. Ina dunna cun duas differentas scarpas ed ina corda da paternoss. En la nova exposiziun dal Museum Retic a Cuira ins po contemplar las restanzas da la giuvna dunna e vegn a savair dapli da sia persuna.

Las restanzas da la dunna da Porchabella.
Legenda: Las restanzas da la dunna da Porchabella. G.-M. Maissen

La dunna da Porchabella

Dataziun
enturn 1690
Vegliadetgna tar l'accident
20 - 25 onns
Grondezzaca. 1.57 meters
Lieu da chatVadret da Porchabella (Bravuogn), 2625 m. s. m.

La dunna nunenconuschenta

Da la dunna da Porchabella na san ins betg bler. Tuttina è ella per archeologs e glaziologs fitg interessanta. La corda da paternoss ch’ella aveva cun sai per exempel, inditgescha ch’ella è probablamain catolica. Quai che vul dir che la dunna n’era betg da l’Engiadina ni da Bravuogn. Ella era pia sin in viadi pli lung. Il scienziads supponan che la dunna era en tschertga da lavur. La vestgadira rutta e simpla inditgescha che la dunna era magari paupra.

Betg ina pastera ni pura

Tenor l’equipament che la dunna aveva cun sai, supponan ils experts che la dunna n'era betg ina pastera en tschertga d’ina nursa. Quai han ins l'emprim supponì. En quella regiun na datti era betg alps. L‘equipament para plitost d’esser per in viadi alpin. Sche la dunna era suletta ni en ina gruppa ed en tge direcziun ch’ella era en viadi na han ils scienziads betg pudì eruir.

Glatschers sco mez strategic dal militar

In’autra part da l’exposiziun s’occupa cun la muntada dals glatschers per las armadas. Uschia avevan las armadas en las differentas guerras da passar ils pass per vegnir dal nord al sid. Tgi che controllava ils megliers pass, aveva uschia era in grond avantatg tar ils cumbats. Ils auters avevan da marschar sur pass pli malsegirs cun la consequenzas da perder ina massa schuldads.

Cun cigarettas e sal tras la notg

Durant il temp da pasch pudevan cuntrabandists far gronds gudogns cun lur rutas zuppadas sur ils pass da glatschers. Dasper cigarettas vegniva era savens transportà illegalmain sal u graun: quai durant la notg e savens era sut privel da vita. Tgi che era dentant pront da ristgar la vita, pudeva far blers raps cun quest transport. L’exposiziun cuzza anc fin ils 28 d’avust.

RR actualitad 08:00