Siglir tar il cuntegn
Inhalt

Grischun La bell’aura carmala da far turas – ma precauziun!

La cumbinaziun da naiv nova, ferms vents e temperaturas miaivlas augmenta il privel da lavinas en las muntognas.

In chaun da lavinas en ina cuntrada da naiv.
Legenda: Cun la bell'aura s'augmenta era il privel da lavinas. Keystone

Dapi glindesdi passà hai dà enfin in meter e mez naiv nova en intginas regiuns dal sid dal Grischun. Sin la fin d’emna sa calma l’aura, era las temperaturas s’augmentan enfin sin 19 grads.

Gian Darms, da l’institut per perscrutaziun da naiv e lavinas a Tavau (SLF) fa attent sin il privel da lavinas che resta en las muntognas. Sur 2’000 meters sur mar datti cundiziuns sco il schaner u il favrer. La cumbinaziun da naiv nova e ferms vents maina tar ina situaziun delicata.

Il privel da lavinas s’augmenta di per di

La fasa miaivla da la fin d’emna procura per in considerabel privel da lavinas. Quai munta ch’ì è fitg simpel da distatgar lavinas e questas pon daventar detg grondas, cunzunt là nua ch’ì ha da naiv nova. Las temperaturas miaivlas pon era chaschunar lavinas spontanas. Sonda è il privel da lavinas spontanas pli gronds che dumengia. Il stgalim 3 (considerabel) resta dentant era la dumengia.

Gia per glindesdi è puspè previs ch’i vegn a naiver. I dat dentant pli pauca naiv nova ch’ils davos dis. Ferms vents augmentan dentant anc il privel.

RR actualitad 17:00