Siglir tar il cuntegn
cuntegn

Grischun L’Uniun grischuna d’artisanadi e mastregn di «Gea» a No Billag

Ina magra maioritad da la suprastanza ha proponì in «gea» sco parola da votaziun da l’Uniun grischuna d’artisanadi e mastregn davart da l'iniziativa No Billag.

Quint da «No Billag».
Legenda: Il motiv principal per in «gea» a la No Billag è il pajament d'impostas dubel per interpresas. Keystone

La suprastanza da l’Uniun grischuna d’artisanadi e mastregn ha proponì in «gea» sco parola da votaziun per la No Billag. Quai cun ina magra maioritad. L'argument central saja stà il pajament da taglia dubel per interpresas: Schebain ch’ils possessur e collavuraturs d’interpresas pajan gia sco persunas privatas taxas da medias, stoppian las interpresas dapi il 2015 pajar ina segunda giada taglias, scriva l'Uniun grischuna d'artisanadi e mastregn. «Quests pajaments da taglia dubels per interpresas n’èn betg giustifitgads. Per interpresas pitschnas e mesaunas cun gronda svieuta e pitschnas marschas n'è questa taglia da medias betg acceptabla.», uschia il president da l’Uniun grischuna d’artisanadi e mastregn Urs Schädler.

Vetiers vegnia che ni la SRG ni il Cussegl federal sajan vegnids encunter a la pretensiun da l’economia da discussiunar davart l'incumbensa dal Service Public. Er la cuntraproposta dal commerzi n’haja betg gì schanza en il parlament.

La politica ha tralaschà il commerzi. Ella ha ni permess la discussiun davart l'incumbensa da la SRG, ni resguardà la cuntraproposta.

Nov president

A la radunanza da delegads dals 2 da matg duai Herbert Steiger vegnir il nov president da l'Uniun grischuna d'artisanadi e mastregn. Quai ha la suprastanza decidì unanimamain. El suonda ad Urs Schädler ch'ha ils davos 12 onns occupà la sutga da president e remetta uss l'uffizi.

L'um da 54 onns è manader e possessur l'Informatica AG. Cun 40 collavuraturas a Glion, Cuira ed en l'Engiadina enconuschia Steiger ils quitads e basegns dal commerzi en bleras regiuns dal grischun.

RR novitads 18:00

No Billag

La No Billag è l'iniziativa che vul abolir las taxas da radio e televisiun. Il suveran votescha ils 4 da mars 2018 davart l'iniziativa.