Co po ina dunna sa dustar sch’ella percorscha ch’ella gudogna pli pauc che ses collegas e quai malgrà ch’ella fa la medema lavur?
«Sco emprim sto ella vegnir tar infurmaziuns pli precisas», declera Silvia Hoffmann, manadra dal post da stab per l’egualitad da las schanzas d'um e dunna. Ins stoppia per exempel savair con gronda che la differenza tranter l‘atgna paja e quella dals collegas saja exact.
Lura possian ins ir tar il biro da persunal e dumandar per scleriment. «Sche la resposta n’è betg cuntentaivla po la dunna s’annunziar tar in post spezialisà e dumandar, tge ch'ella po far sco proxim.» Lura datti anc la pussaivladad dad ir tar il post da mediaziun per la lescha d’egualitad. Là vegn tschertgà il dialog cun il schef u la scheffa. Las duas partidas mettan ils fatgs sin maisa ed ins tschertga ina soluziun.
Er ils umens profitan da pajas egualas
L'um lavura e va per ils daners e la dunna stat a chasa e guarda dals uffants.
Quai è la moda da patratgar tradiziunala u perfin conservativa. Ma ozendi vesa quai or in zic auter.
Blers umens vulan esser pli savens a chasa
Tenor in studi actual vulan 9 da 10 umens lavurar pli pauc per avair dapli temp per la vita privata. Spezialmain babs da famiglia han il giavisch d'esser pli savens a chasa. La realitad vesa dentant ora in zic auter. Actualmain lavuran mo 15-20% dals umens parzialmain.
Sche quai na dess dentant betg differenzas da pajas tranter umens e dunnas, lura fissi plitost pussaivel per ils umens da lavurar pli pauc. La dunna n'avessi betg in dischavantatg envers l’um sch'ella cumenzass a lavurar, di Jöri Schwärzel da l’instituziun maenner.gr
Problems tar pliras interpresas che lavuran per la Confederaziun
Controllas dal biro d'egualitad han mussà problems cun l'egualitad da paja tar passa 25 interpresas che lavuran per la Confederaziun. Tar 6 interpresas saja la toleranza da 5% surpassada e las interpresas hajan stuì far correcturas, scriva il biro d'egualitad.
Enfin uss ha il biro d'egualitad sulet pudì intercurir 0,2% da las 30'000 interpresas che fan lavurs per la Confederaziun.
RR actualitad 06:00