Passa 100 persunas eran preschentas en la sala da baselgia Commander a Cuira. Durant la radunanza generala da la plaiv regiva ina atmosfera trista e fraida. Cun quai che l’entira suprastanza demissiunescha na fa quai betg surstar. Cun la decisiun dal Cussegl da la baselgia evangelica refurmada dal Grischun da l’october passà saja il bainstar da la plaiv periclità. La suprastanza saja fitg dischillusa. L'onn passà aveva il Cussegl chantunal renvià d’acceptar l’elecziun da Carmen Dasoli-Peter en la suprastanza da Cuira, damai ch'ella viva dapi in temp a Trin e betg a Cuira.
Bler laud per la suprastanza e Carmen Dasoli-Peter
Blers lauds ed applaus ha igl dà per la presidenta retratga Carmen Dasoli-Peter. Ella saja stada ina fitg cumpetenta e cordiala presidenta. Era il pled putgà e vegni duvrà savens. Ensemen cun l’entira suprastanza haja ella en ils ultims onns procurà per ruassaivladad e collegialitad en la plaiv. Era è vegni proponi che betg l’entira suprastanza sa retiria. Dentant ha l’entira suprastanza refusà questa idea. Sch’ins saja part dal problem na possian ins betg era esser part da la soluziun. Uschè l’argumentaziun da la suprastanza. La presidenta retratga Carmen Dasoli-Peter ha durant l’entira radunanza dentant era adina puspè intunà ch’ins duai ussa sa concentrar sin il futur e betg pli s’occupar cun il passà. Quai na portia a la plaiv nagut.
La suprastanza retratga:
Plaiv evangelica da Cuira
- presidenta: Carmen Dasoli-Peter
- vicepresident: Julius Risch
- infrastructura: Uolf Bardy
- finanzas: Peter Wolfensberger
- social: Roger Frischknecht
Betg pussaivel da trair vinavant la decisiun
La suprastanza deplorescha l’abdicaziun immediata da Carmen Dasoli-Peter. Cun quest pass vul la presidenta metter ina fin a la dispita tranter la baselgia chantunala e la plaiv da Cuira. Questa demissiun impedescha dentant da trair vinavant la decisiun a la Dretgira administrativa grischuna. Tenor la suprastanza da la plaiv evangelica da Cuira avess in tal recurs gì bunas schanzas..
Curatur e cumissiun duain organisar novas elecziuns
«Damai che la suprastanza demissiunescha in corpore vegnin nus suenter a metter en in curatur», declera Andreas Thöny, il president dal Cussegl da la baselgia evangelic-refurmada grischuna. Quai muntia che questa persuna prendia enta maun las fatschentas ed obtegnia er cumpetenzas da decider. «Questa persuna vegn era incumbensada d'organisar novas elecziun uschè svelt sco pussaivel.» Cura che quai vegnia lura ad esser il cas na po Thöny dentant anc betg dir.
Plinavant ha la radunanza era decidì dad eleger ina gruppa che duai chattar novs suprastants pussibels. Questa exista or da tschinch persunas da ed or da la plaiv evangelica da Cuira:
- Heinz Näf
- Augsegner Alfred Enz
- Peter Wolfensberger
- Andi Gfeller
- Fred Schütz
RR novitads 06:00, Actualitad 08:00