Siglir tar il cuntegn

Header

cuntegn

Iniziativa chatscha speziala Gronda participaziun a la votaziun

L'iniziativa per abolir la chatscha speziala ha fatg naufragi. 54% dal suveran grischun han mess in NA en l'urna da votaziun. L'interess vi da questa iniziativa è stà grond – 49% dal suveran grischun ha dà giu sia vusch.

L'interess vi da l'iniziativa cunter la chatscha speziala è cumparegliabel cun la votaziun davart il credit per gieus olimpics en Grischun. Quella giada eran 50% da la populaziun stads a votar.

Votaziuns naziunalas mobiliseschan

En la media dals ultims tschintg onns munta la participaziun a votaziuns en Grischun a 45%. En egl dat surtut che votaziuns naziunalas mobiliseschan la glieud. Cun ina participaziun da 54% han l'iniziativa cunter l'immigraziun da massa e l'iniziativa cunter las taxa radio e televisiun (Billag) fatg naufragi. E cun ina tuttina auta participaziun è il credit per ils aviuns da cumbat Gripen vegnì acceptà.

Records da participaziun

Il record dals ultims tschintg onns hai dà il 2016. Cun ina participaziun da 61% ha ils suveran refusà l'iniziativa che vuleva repatriar effectivamain persunas estras criminalas. Dal record absolut è dentant era questa cifra lunsch davent. Il 1992, cura ch'i gieva per la commembranza da la Svizra da l'EWR, han 76% da las persunas cun dretg da votar en Grischun dà giu lur vusch. Il project da votaziun federal era vegnì refusà.

RR novitads 06:00

Artitgels legids il pli savens