Ir a viandar, star a sulegl e far patgific u forsa perfin anc ina giada ir a far bogn? Da dis da bellezza han ins era durant l'atun ina gronda schelta. L'entir di avain nus visità lieus nua che la glieud era vid giudair la bell'aura.
Il lai da Cauma cun siu «charme» d'atun
Gia il parcadi che sisur il lai da Cauma en la vischnanca da Flem è plain cun autos. Tenor las numers d'auto vesan ins ch'ils blers visitaders vegnan dalla bassa. Era sin via envers il lai audan ins bleras linguas estras.
Cura ch'ins arriva tar il lai sa mussa ina survista fascinonta. Il lai traglischa en in bellezza stgir-blau. Sper la riva sa chattan ins tscherts giasts che giaudan la ruassaivladad. Blers na han betg il curaschi da siglir en l'aua fraida. Pervia quai giaudan els pli gugent ina bavronda en la bar che è pulit plaina.
La plazza da golf a Sagogn sco magnet da turists
Durant il temp d’atun sa mussa sin il plaz da golf a Sagogn ina bellezza cuntrada. Las plantas èn vid perder lur feglia, ma il pastg è frestgs ed anc bunamain tut verd. Sulettamain en tscherts pitschens lieus sa chattan tocca da terratsch ch'ils giugaders han stgarpà ora entras sajets malgartegiads.
Il spazi per giugar sin la plazza da golf è pulit occupada. Il sulegl traglischa ed tschertas nivlas porschan als giugaders in’aura perfetga per dar ina runda golf.
Atun optimal per il pli lung traject da scarsolar svizzer
A Churwalda dettia strusch differenzas tranter il manaschi da stad e quel d'atun. La situaziun actuala saja fitg allegraivla, uschia René Schiess, il manader da Pradaschier SA. Durant in di optimal da bell'aura vegnian bun 1'000 persunas a scarsolar. Perfin il settember, che saja il passà stà in dals flaivels mais saja quest onn stà in mais grondius. Durant las vacanzas d'atun sajan oravant tut turists svizzers sin il traject da scarsolar.
Bler sulegl durant l'october è normal
Fasas da bell'aura durant il mais d'october saja insatge normal, di Luzian Schmassmann dad SRF Meteo. Quai hajan els perscrutà ils ultims onns tar ina staziun da mesiraziun a Tavau. Nus avain chattà ora ch'i dettia fitg savens fasas lungas da bell'aura durant l'october. Il 2017 hai per exempel fatg bell'aura davent dals 10 fin ils 20 d'october.
RR actualitad 07:00++