Siglir tar il cuntegn
cuntegn

Grischun «Il purtret sco tal na vegn betg pli stimà»

L’agentura da fotografias Swiss-Image ha decis da schliar il contract cun il WEF. Las fotografias na vegnan betg stimadas avunda dal WEF, di Swiss-Image.

Andy Mettler é dapli onns da la partida al WEF.
Legenda: Andy Mettler è dapi onns da la partida al WEF. Rémy Steinegger

Andy Mettler - il schef da Swiss-Image - ha ina stretga relaziun cun il WEF a Tavau. Sez ha el lavurà en tut 36 onns al WEF, saja quai sco schurnalist u sco fotograf. La mesadad da quest temp è el sta en acziun per sia firma Swiss-Image. Tant pli gronda è la dischillusiun ch'i n'ha betg dà in autra soluziun che la decisiun da schliar il contract cun il WEF.

Igl è donn, il purtret sco tal na vegn betg pli stimà tant sco quai ch'el stuess
Autur: Andy Mettlerschef Swiss-Image

Il purtret sco tal na vegnia betg pli stimà dal schef da las medias Adrian Monck. Monck sez na vuleva betg prender posiziun davart las rinfatschas. La collavuraziun saja daventada pli greva cun il nov schef da medias.

Purtar las consequenzas

Cun la decisiun da Swiss-Image da schliar il contract cul WEF va er a perder blera lavur per la firma. Dad in di sin l’auter na saja quai era betg pussaivel da cumpensar tut la lavur e tut il temp ch'ins ha mess en la preparaziun dal WEF. E là nua ch'i va per lavur e per temp, là va quai era per raps. Andy Mettler fa quint cun ina sperdita da plirs dieschmilli francs.

Per emplenir la fora stuess Swiss-Image en prima lingia chattar eveniments per remplazzar la lavur dal WEF durant ils mais da november, december e schaner. Però, era autras mesiras da spargn èn dumandadas. Per exempel è ina persuna vegnida relaschada.

La decisiun da betg pli collavurar cun il WEF na saja betg stada ina simpla. Per ina pervi da las consequenzas finanzialas e per l’autra perquai che Andy Mettler ha ina buna relaziun cun Klaus Schwab, il schef dal WEF. Ord quest motiv è Andy Mettler er vinavant envidà al WEF. Però, schebain el va al WEF u betg, quai na sa el anc betg...