Siglir tar il cuntegn
Inhalt

Grischun Il luf duai esser in capricorn - di era la regenza grischuna

La revisiun da la lescha federala da chatscha vul metter il luf sin il medem nivel sco il capricorn. Per il Grischun signifitgass quai, ch'il chantun pudess reglar il dumber da lufs ed er sajettar in u l'auter.

In luf en la natira.
Legenda: La nova lescha da chatscha federala prevesa da tractar il luf sco il capricorn. Keystone

Adina sch'il luf è tema en il Cussegl Grond datti discussiuns. D'ina vart èn ils purs che teman per lur animals, da l'autra vart èn ils protecturs da l'ambient. Ed er questa giada èsi vegnì debattà sur da «bun luf» ubain «nausch luf» avant da sa deditgar a las dumondas ch'èn propi vegnidas tschentadas.

Retard tar il pajament d'indemnisaziuns pervi da motivs persunals

Reto Crameri (PCD) vuleva numnadamain savair, pertge ch'igl uffizi da chatscha haja adina uschè ditg da pajar indemnisaziuns a purs per lur animals stgarpads. Quai sajan motivs persunals cun quai ch'igl haja dat in cas da malsogna en l'uffizi ed uschia sajan sa rimnadas pendenzas.

La segunda dumonda da Reto Crameri aveva lura en mira la lescha da chatscha: El vuleva savair tgenina influenza che la revisiun da la lescha da chatscha federala haja sin sajettar il luf en il Grischun.

Cavigelli: En la lescha duajan luf e capricorn esser eguals

Pertutgant la revisiun da la lescha da chatscha federala ha il cusseglier guvernativ Mario Cavigelli (PCD) infurmà, ch'igl saja prevesì da tractar il luf tuttina sco il capricorn.

Quai vul dir, ch'ils chantuns pudessan reglar il dumber da lufs. Quai dentant be davent dals 16 da settember enfin ils 31 da schaner. La lescha è dentant anc betg definitiva.

RR actualitad 17:20