Siglir tar il cuntegn
cuntegn

Grischun Central Vifa Cazas: Dapli visitaders che spetgà

L’exposiziun da commerzi e mastergn Vifa (Viamala Fest & Ausstellung) ha gì dapli che 3000 visitadras e visitaders. Ils organisaturs èn fitg cuntents, atgnamain quintavan els mo cun radund 2000 persunas che visitan l’exposiziun.

Legenda: Guardar il video Visita a la Vifa, l’exposiziun da commerzi e mastergn da la regiun da Viamala. Durada 03:33 minutas.
Or da Telesguard dals 13.04.2018.

Sco quai che Philipp Berri il schef da finanzas dal comité d’organisaziun ha ditg, speria el sin ina bella cifra naira. Sin basa dals buns resuns dals expositurs e dals visitaders è el da buna speranza, ch’ins possia en duas u trais onns puspè manar tras l’exposiziun da commerzi a Cazas. Cuntanschì ins haja plinavant la finamira, da beneventar era blers giuvens a Cazas, uschia saja per exempel il concert da hiphop da sonda saira stà visità fitg bain. Sulet il venderdi saira na saja la tenda da festa betg stada occupada fitg bain, qua ins veglia guardar tge ch’ins possia meglierar en l’avegnir, uschia Philipp Berri.

L’emprima «vifa» ha gì lieu l’onn 2012 e la segunda l’onn 2014. Quellas exposiziuns èn stadas mintgamai sin la via principala Neudorfstrasse a Tusaun. La midada en l’arena Grischuna a Cazas saja stada ina buna decisiun, ha ditg plinavant Philipp Berri. Preschentas a l’exposiziun èn stadas 45 firmas da l’economia ed instituziuns dals secturs socials e da sanadad.

RR actualitad 06:00