Siglir tar il cuntegn

Header

cuntegn

Viaduct da la Landwasser La Viafier retica vul dar gas – er sper ils binaris

En l’anteriur negozi dal consum a Filisur è vegnì inaugurà in local d’infurmaziun pertutgant l’inscenaziun dal viaduct da la Landwasser. Enfin la fin da l’onn è il local avert durant il di, ed ina giada al mais datti referats davart il project.

«Nus vulain dar gas» quai di Roman Cathomas da la Viafier retica e manader dal project per las inscenaziuns enturn il viaduct da la Landwasser. Cun quel en il center vul la Retica numnadamain render pli publics differents lieus da la Val d’Alvra.

Las ideas, tge inscenaziuns ch’i pudess dar, daventan adina pli detagliadas:

audio
Mezdi: Inscenaziun nova dal viaduct da la Landwasser
ord Actualitad dals 02.07.2019.
laschar ir. Durada: 3 minutas 19 Secundas.

In project cun dimensiuns grondas

Per mussar, tge che la Viafier retica chapescha sut «dar gas» datti uss in local d'infurmaziun. En quel mussan diversas visualisaziuns, tge ideas che pudessan vegnir realisadas:

  • Uschia pudessi dar a Surava in center per ils visitaders ed in deposit per trens istorics.
  • Tranter Filisur ed Alvagni duessi dar ina nova staziun cun ina plattafurma, nua ch’ins po vesair il viaduct da la Landwasser.
  • Sin in bain puril duessi dar diversas attracziuns per pitschen e grond.
  • Per tematisar il guaud duai dar ina tur, davent da la quala ins duai pudair far il gir cun in endriz, nua ch’ins penda cun ina tschinta vid conduct en ils auts.

Cumpigliads en il project duessan er vegnir il museum da viafier a Bravuogn, ed il bogn dad Alvagni.

Las attracziuns planisadas en ina survista.
Legenda: Las attracziuns planisadas en ina survista. mad

Populaziun duai far propostas

Enfin la fin da l’onn vegnan ils projectaders a rimnar ideas e propostas da la populaziun. En quest temp vegnan realisads ils businessplans, i vegn fatga la planisaziun d’investiziun, ed in plan da finanziaziun per mintga attracziun.

En radund in onn duai l’ura vegnir cumenzà cun la planisaziun da la realisaziun. L’entira fasa da project cuzza enfin il december 2020.

Investiziuns da 20 milliuns

Il project «Erlebnis Landwasserviadukt» va dapi il 2016. Per la planisaziun stattan a disposiziun 1,9 milliuns francs – tar investiziuns planisadas da radund 20 milliuns francs. Ils projectaders quintan cun radund 100’000 visitaders ad onn. Purtaders dal project èn la Viafier retica, l’entira regiun Alvra, la vischnanca da Tavau, il Parc Ela e Grischun vacanzas.

RR actualitad 12:15

Artitgels legids il pli savens