Siglir tar il cuntegn

Grischun Central Via tranter Brinzauls e Lantsch è averta

La via tranter Brinzauls e Lantsch ch’è stada serrada durant diesch dis pervi da crudada da crappa, è puspè averta. Sco quai ch’il geolog responsabel Ruedi Krähenbühl ha ditg, saja la via ussa puspè segira.

In auto che cursescha da Lantsch a Brinzauls, da maun dretg è da vesair in rempar cun crappa.
Legenda: Ils autos pon puspè cursar sin la via tranter Brinzauls e Lantsch. RTR, F. Belotti
Vista sin la muntogna sur Brinzauls ch'è en moviment. In grond crap ch'è vegnì giu è anc da vesair.
Legenda: Gia dapi blers onns è la muntogna sur Brinzauls en moviment. RTR, F. Belotti

Sche i na vegnia betg a dar ina plievgia pli gronda il proxim temp, possia la via restar averta, uschia il geolog. Dapi onns è la via tranter Lantsch e Brinzauls adina puspè serrada pervi da crudada da crappa. Indrizs tecnics mesiran permanentamain ils moviments da la muntogna sur Brinzauls. Dasperas la via datti in lung rempar, nua che la crappa vegn tegnida si.