Siglir tar il cuntegn

Header

video
Lai: Project da 6 milliuns francs chaschuna chaus cotschens
Or da Telesguard dals 16.01.2019.
laschar ir. Durada: 3 minutas 24 Secundas.
cuntegn

Grischun Central Vaz: Project dispitaivel e votaziun cun retard

Remplazzar ils bajetgs vegls da la plazza da sport en il center da Lai custa prest 6 milliuns francs enstagl dals 2.5 milliuns francs budgetads. Quai è in dals puncts dispitaivels dal project. Vitiers sto la votaziun vegnir spustada sin ils 10 da favrer – pervi d'in sbagl tar la Posta.

La plazza da sport a Lai è da grond’impurtanza – saja quai l’enviern sco era la stad, scriva la vischnanca da Vaz en il messadi da votaziun. Uschia vegn la plazza l’enviern duvrada per ir cun patins, giugar hockey, curling e tschoccas sin glatsch. La stad vegn la plazza da sport duvrada per dar ballape, plinavant datti in percurs da currer da 100 meters. Tar la vischnanca da Vaz ins è ussa vegnì a la conclusiun, ch’i dovra midadas.

Vinavant diever da stad ed enviern

Ina cumissiun dal cussegl communal è da l’opiniun, ch’ins duess duvrar la plazza da sport vinavant la stad sco era l’enviern. Il bajetg da las gardarobas na correspundia per encunter betg pli als basegns dad oz. I manchia ina pussaivladad da mangiar ed er in salv per ils patins ch’ins po pigliar a tschains, è la conclusiun da la cumissiun dal cussegl communal.

audio
Saira: Vaz – Project dispitaivel
ord Actualitad dals 15.01.2019.
laschar ir. Durada: 2 minutas 12 Secundas.

Biro da Zorten gudogna concurrenza

La stad passada han trais biros d’architectura da Vaz inoltrà in studi da project anonimisà. Gudagnà la concurrenza ha il biro da Michael Hartmann da Zorten. Ses project prevesa tranter auter in bistro, novs bajetgs d’infrastructura ed in bajetg central nov cun ina nova tribuna.

En tut duessan vegnir investids circa 6 milliuns francs, tge ch’è 3,5 milliuns dapli che budgetà. Co è quest ferm augment pussaivel?

En il messadi argumentescha la vischnanca da Vaz suandantamain:

Ils 2,5 milliuns francs èn mo stads ina stimaziun groppa dals custs. Surtut ils custs per ils indrizs tecnics èn vegnids sutvalitads massivamain e budgetà bler memia bass. Uschia custa mo la tecnica per il glatsch artifizial dapli che 1,5 milliuns.
Autur: Vischnanca da Vaz

Il project è dispitaivel

Quai sa mussa en diversas brevs da lecturs criticas, ch’èn cumparidas avant curt en la pressa grischuna. Tranter auter vegn crititgà l’augment dals custs da construcziun, ad auters puspè na plascha il project opticamain betg. N'er il cussegl communal è unì: El ha approvà il december il project cun 10:5 vuschs.

audio
Bunura: Lai/Vaz: Novs bajetgs plazza da sport – reacziuns
ord Actualitad dals 16.01.2019.
laschar ir. Durada: 3 minutas 1 Secunda.

Votaziun ha retard

La votaziun davart il credit per remplazzar ils bajetgs vegls da la plazza da sport a Lai sto vegnir spustà. Enstagl da dumengia vegn pir votà ils 10 da favrer. Sco quai che la vischnanca ha ditg a la saira d’infurmaziun, n’hajan betg tut ils radund 1'700 votants survegnì ils documents necessaris.

Il sbagl saja capità tar la Posta, lezza saja s'exculpada. Radund 200 cuvertas cun il material da votaziun na sajan betg vegnidas distribuidas, ha communitgà la chanzlia.

audio
Mezdi: Votaziun davart implants da sport a Lai
ord Actualitad dals 25.01.2019.
laschar ir. Durada: 4 minutas 40 Secundas.

RR actualitad 17:00

Artitgels legids il pli savens