Siglir tar il cuntegn
cuntegn

Grischun Central Vacum a la testa da las pendicularas Spleia-Tambo SA

ll president dal cussegl d'administraziun Silvio Catrina sa retira per immediat, ensemen cun ils commembers dal cussegl d'administraziun Gion-Andri Decurtins e Richard Hänzi.

Il vitg da Spleja
Legenda: La relaziun tranter Spleia e las pendicularas è fitg disturbada il mument. Keystone

Ils trais commembers dal cussegl d'administraziun argumenteschan lur decisiun tranter auter cun memia pauc sustegn da la vischnanca Spleia per realisar la strategia 2025 da las pendicularas. E la fidanza manchia en vista a las opiniuns differentas tranter els e la vischnanca pertutgant ils duairs, las cumpetenzas e la responsabladad.

Era directur banduna las pendicularas

Cun avair conuschientscha dals schabetgs haja abditgà gia avant il directur Andrea Camastral, aschuntan las pendicularas. Camastral maina l’interpresa dapi 16 onns, l’abdicaziun vala per la fin dal november 2017.

Decisiun da la suprastanza communala

Sco las pendicularas scrivan, haja la suprastanza communala da Spleia decidì ils 10 da schaner definitivamain da betg sa participar a l’augment dal chapital d’aczias che las pendicularas avevan dumandà.

La gievgia suentermezdi ha la vischnanca da Spleia scrit, ch'els prendian enconuschientscha da las abdicaziuns tar las pendicularas Spleia-Tambo SA. La vischnanca desistia d'entrar sin las renfatschas fatgas dals commembers partents dal cussegl d'administraziun. Davart il proceder futur vul la vischnanca infurmar pli tard.

Demissiuns n'èn nagina surpraisa

Per ils presidents communals da Nufenen e da Valragn han ditg sin dumonda da RTR, na sajan las demissiuns en il cussegl d’administraziun betg vegnidas surprendentamain. Igl haja il davos temp adina puspè da tensiuns. Georg Trepp il president communal da Valragn manegia, ch’ussa possia Spleia decider sulet davart il chapital d’aczias, cun quai che tut las vischnancas hajan fatg dependent lur decisiuns davart il gea da Spleia. Per Markus Meuli il president communal da Nufenen ha la gronda midada en il cussegl d’administraziun er ina vart positiva: «Cun novas persunas avain nus ussa la pussaivladad da purtar la fatschenta sin curs». Sco quai ch’el ha ditg plinavant, avess Nufenen giavischà da pudair vegnir meglier involvì en ils discurs davart la strategia 2025: «Dumondas per midadas n’eran quasi betg pussaivlas», uschia Markus Meuli.

Fontana represchenta la Val Schons

Il president communal d’Andeer Hans Andrea Fontana vul per il mument represchentar vinavant la Val Schons en il cussegl d’administraziun da las pendicularas da Spleia: «Las pendicularas da Spleia am stattan a cor ed ellas èn impurtantas per la regiun». Tar la proxima radunanza generala vegnia el a decider, sch’el vegnia a restar en il cussegl d’administraziun. Co che quel pudess vesair ora en il futur na sa el betg: «A mai n’èn betg enconuschents nums da successurs pussaivels», uschia Hans Andrea Fontana.

RR actualitad 12:00