Siglir tar il cuntegn
Inhalt

Grischun Central Ulteriura mesira da spargn tar las Pendicularas Savognin

Las Pendicularas da Savognin adatteschan l’urari d’enviern. Da nov avran las pendicularas pir las 09:00 e betg pli las 08:30. «Sin basa da las frequenzas flaivlas, avain nus decidì dad avrir pli tard», ha ditg Leo Jeker, commember dal cussegl d’administraziun da las pendicularas da Savognin.

Sutgera da Savognin a Tigignas
Legenda: La sutgera da Savognin a Tigignas cursescha l'enviern pir a partir da las 09:00 e betg pli 08:30 la damaun. RTR, F. Belotti
La nova pendiculara da 10 persunas era la davosa gronda investiziun da las Pendicularas da Savognin SA.
Legenda: La nova pendiculara da 10 persunas era la davosa gronda investiziun da las Pendicularas da Savognin SA. RTR, F. Belotti

Gia l’enviern passà han las Pendicularas da Savognin SA stritgà il Snowliner, in ratrac public che cursava tranter Tigignas e Radons. La raschun eran era là las finanzas e frequenzas flaivlas. Plinavant han las Pendicularas transferì il post da marketing da Savognin en l’Austria ad Innsbruck. Tenor Leo Jeker possian ins uschia nizzegiar sinergias. La maioritad d’aczias (51.5%) da las Pendicularas da Savognin possedan dapi il 2010 Markus Schröcksnadel ed ils frars Anton e Peter Schmidl. Dals 40 milliuns francs investiziuns ch’els avevan mess en vista avant 5onns, èn enfin ussa vegnids investids 14 milliuns francs, tranter auter en indrizs da far naiv ed en ina pendiculara nova, ha ditg Leo Jeker. Davart las quatter persunas da cader ch’han bandunà l’interpresa ils davos 12 mais n’ha Jeker betg prendì posiziun.