Turs da glisch sin il Güglia per sis milliuns

Il festival cultural Origen duai survegnir ina sort cumpogn. Sin il pass dal Güglia duai vegnir erregì usche spert sco pussaivel in nov teater. Quel duai avair la furma d'in octogon cumpletà cun 8 turs da glisch.

Il festival Origen duai vegnir pli grond. Quai è l'idea dal nov project sin il pass dal Güglia visiunà da Giovanni Netzer. Sin il pass duai vegnir erregì l'octogon cun 8 turs che laschan entrar la glisch natirala da sura e duain uschia lubir in gieu cun la glisch tut extraordinari per in teater.

Il project duai - cun las preschentaziuns che duain avair lieu en tuttas quatter stagiuns - custar tut en tut da quai dad 1.2 milliuns francs ad onn e cuzzar tschintg onns.

Finanziaziun anc betg clera

Cura ch'il project po vegnir realisà è il mument anc betg cler. Anc saja per l'ina da spetgar sin la lubientscha definitiva per bajegiar e per l'autra saja il project era anc da finanziar. Quai ha detg Giovanni Netzer sin dumonda. Il Chantun - ils departaments da cultura e d'economia vegnan ins a dumandar en chaussa.

Segund festival

Ins giaia uss però vidlonder cun gust e vul realisar il project usche spert sco pussaivel, uschia Netzer. A la preschentaziun dal project il di da Bumaun a Riom è l'intendant dad Origen plinavant s'exprimì el senn, che quai grond nov project saja sco in segund festival - sper il festival cultural Origen.

Laschar ir video «Preschentaziun dal nov project d'Origen sin il Güglia»

Preschentaziun dal nov project d'Origen sin il Güglia

1:30 min, Actualitad video dals 2.1.2016

Bajetg «semitemporar»

Il chantun ha dà la lubientscha per il bajetg «semitemporar» per trais enfin tschintg onns - bler dapli che normal per bajetgs temporars (guarda chaschina). Il term «semitemporar» che duai descriver la situaziun speziala saja ina creaziun da Giovanni Netzer sez. Quai ha detg la presidenta da Silvaplauna a la preschentaziun dal project.

Bajetg temporar

Bajetgs temporars èn bajetgs che vegnan erregids cun lubientscha speziala da las autoritads per in temp da per regla trais mais.
La lubientscha per il nov project da Giovanni Netzer è però vegninda dada per trais enfin tschintg onns. Uschia na pon ins en sasez betg tschantschar dad in bajetg temporar.