Siglir tar il cuntegn

Header

Navigaziun

cuntegn

Grischun Central Tinizong: chattà ustier per «La Scuntrada»

Per l’ustaria cun butia «La Scuntrada» che vegn actualmain construida a Tinizong, ha l’uniun da promoturs La Scuntrada chattà in ustier. Quai ha confermà envers RTR Tina Nüesch-Felber, la presidenta da l’uniun.

Il num da l’ustier vegn communitgà pli tard, cun quai che l’ustier ha anc in contract en in auter lieu.

Cuntent cun chapital da partenza

L’uniun che vegn a manar l’ustaria è actualmain anc vi da rimnar daners sco chapital da partenza. Dals passa 100 commembers sajan gia vegnids ensemen blers daners, da la finamira da 200’000 francs ins saja ussa fitg damanaivel, di la presidenta da l’uniun.

Intginas surpraisas

Cun las lavurs da construcziun vai ussa enavant tenor plan, era sch’i haja dà intginas surpraisas. Tenor Tina Nüesch-Felber hajan els per exempel chattà lingias d’auta tensiun sut la garascha sutterana planisada. Ed in chavaterra haja demolì la fatschada da la sala da gimnastica.

Custs sur il budget oriund

La Scuntrada che vegn construida en la halla da gimnastica da la scola veglia da Tinizong, è vegnida budgetada cun 1,9 milliuns francs. Pervi da differentas lavurs d’adattaziun ha la vischnanca da Tinizong-Rona approvà ils 10 da december da l’onn passà in credit supplementar da 260’000 francs. Sche tut va tenor plan, avra La Scuntrada mez da quest onn.

RR Actualitad bunura 06:00