Siglir tar il cuntegn
Inhalt

Grischun Central Teater en il liber sin il Pass dal Güglia

Il festival cultural Origen ha preschentà ils plans detagliads dal teater sin il Pass dal Güglia. Sin bun 2’300 meters sur mar duessi dar preschentaziuns durant tuttas stagiuns ils proxims quatter onns.

L'intendant da Origen Giovanni Netzer preschenta in model dal teater planisà.
Legenda: L'intendant da Origen Giovanni Netzer preschenta in model dal teater planisà. RTR, F. Belotti
Uschia pudess il teater sin il Pass dal Güglia vesair ora.
Legenda: Uschia pudess il teater sin il Pass dal Güglia vesair ora. RTR, F. Belotti

Ils plans per il teater prevesan ina furma d’ina tur, sumeglianta a las turs da Babilon dal temp medieval e dal temp baroc. Ina tur da laina duess vegnir adina pli stretga cunter ensi, cun artgs che van anor. Per ils aspectaturs è planisà ina tribuna centrala cun 300 plazs. Enturn questa tribuna èsi previs da far foyers sin differentas autezzas, che lubeschan da guardar sin la tribuna principala u en la natira. Quai ha ditg Giovanni Netzer, l’intendant da Origen. Actualmain saja il project sin il Güglia en la fasa da finanziaziun. Ins saja ultra da quai vi dad organisar las lubientschas. Al chantun hajan ins fatg la dumonda d’augmentar la contribuziun annuala da 200’000 francs per il program da stad sin 480’000 francs per las producziuns da l’entir onn. Sch’il teater sin il Pass dal Güglia vegn realisà, alura s’augmentan ils custs da producziun annuals da 2.1 milliuns francs sin 3.7 milliuns.

Nov record da visitaders

Plinavant ha Origen preschentà las cifras da la davosa stagiun da stad ch’ha cuzzà passa trais mais. Dapli che 12’000 persunas hajan visità las differentas preschentaziuns da stad. Quai saja circa 2’000 dapli che l’onn passà.