Per pudair mazzar giaglinom direct sin il bain puril, hai gì num sclerir la situaziun legala. Perquai è il pèr da Cunter che maina la firma Schlachtmobil stà en contact cun ils responsabels dal chantun e da la Confederaziun. Sco Thomas Leppkes ha ditg envers RTR, haja quai gia dà en il Grischun ed en il chantun Argovia demonstraziuns da mazzar giaglinom. Il zercladur saja lura arrivada la lubientscha definitiva da pudair mazzar giaglinom direct sin il bain puril.
Interessents èn avant maun
L’idea saja da pudair mazzar era mo paucas giaglinas. Per mintga animal mazzà èsi da pajar 5 francs, vitiers vegnan anc custs da 200 francs per nettegiar il char annex, plus ils kilometers davent da Cunter fin tar il bain puril. A partir da 50 giaglinas possia quai gia render da mazzar al lieu, di Leppkes. El saja persvadì che l’affar vegnia a marschar. Sia firma haja gia bleras dumondas da purs che mazzassan gugent lur giaglinom sin il bain puril.
Grazia a l’agid da trais investiders èsi stà pussaivel da realisar il project cun il char annex. L’idea è da porscher il mazzar giaglinom sin bains da l’entira Svizra.
Metoda gia en diever en l'Austria
En l’exteriur funcziuna gia la pussaivladad da mazzar giaglinom sin il bain puril. L'interpresa austriaca Maschinenring scriva sin sia pagina d’internet, che mazlers vegnian direct sin il manaschi per mazzar. Igl è pussaivel da laschar mazzar giaglinas, andas, galdinas ed aucas. Grazia a quest char annex possian ins evitar transports d’animals nunnecessaris – ed la creaziun da valur restia sin il manaschi cun vender direct la charn sin il bain puril.