Il cudesch en rumantsch, cun singulas parts en tudestg, ha 12 chapitels tematics. Ils chapitels in e dus sa deditgeschan a l’istorgia da Tinizong e Rona, il chapitel trais a las fusiuns. Populaziun, cultura e religiun, economia, natira e resursas natiralas, activitad da las uniuns, scola e projects novs d’infrastructura furman ils puncts centrals da las explicaziuns che suondan. Arrundada vegn la cronica cun ina contribuziun da l’archeolog Manuel Janosa davart l’istorgia da la construcziun da la baselgia parochiala da Son Plasch e davart la fossa da famiglia dals de Marmels.
Fotografias ed illustraziuns
Passa tschient fotografias istoricas ed actualas, plans, illustraziuns e documents cumpletteschan la cronica. Las fotografias derivan dal fotograf turitgais Rudolf Zinggeler, ch’ha documentà la populaziun e la cuntrada dal Surses enturn la midada al ventgavel tschientaner.
La vernissascha dal cudesch è ils 13 d’avust a las quatter il suentermezdi en l’ustaria La Scuntrada a Tinizong.