En la vischnanca da Surses en il territori da «Sur» e la «chapella Son Roc» è l’aua da baiver puspè netta e po vegnir consumada. Quai scriva la vischnanca da Surses sin sia pagina d’internet.
Aua stada contaminada
L’aua a Sur e la chaplutta da Son Roc en il Surses era contaminada cun colibacterias. Perquai pudev'ins betg baiver l’aua a Sur per in pèr dis senza buglir. La vischnanca da Surses ha cusseglià da baiver aua minerala en quest temp.
Sco quai che Martegn Netzer, il manader dal servetsch tecnic da Surses ha ditg sin dumonda dad RTR, possian ils temporals dals davos dis e las buatschas sin la pastgira esser la raschun per la contaminaziun. Ins haja vis che biestga haja surpassà ina saiv. Uschia pudess la muaglia esser vegnida en il conturn d'ina tschiffada d'aua ed uschia avair tschufragnà l'aua. Il mument vegnian las lingias ed il reservuar nettegià. Il reservuar da Sur saja gia vegnì svidà ina giada cumplettamain. Quai saja stà pussaivel grazia il nov reservuar che haja dus tancs independents e betg mo in.
