Surses di cleramain gea a sustegn finanzial per bogn

La radunanza communala constitutiva da Surses ha deliberà dus affars per mauns da l’urna. La nova vischnanca Surses duai sa participar finanzialmain vi da la contrucziun d'in bogn da divertiment (4 milliuns fr.) e vi da custs annuals dal bogn (400'000 fr.).

Il president communal da Savognin Patric Vincenz declera il project, da maun dretg Manfred Moschner, l'investur principal.

Legenda da maletgs: Il president communal da Savognin Patric Vincenz declera il project, da maun dretg l'investur Manfred Moschner. RTR, F. Belotti

La contribuziun da quatter milliuns da la vischnanca da Surses vi da l’investiziun per realisar il bogn da divertiment a Savognin Barnagn, è vegnida approvada cun 228:6 vuschs. La contribuziun annuala da 400'000 francs vi dals custs da travagl dal bogn è vegnida approvada cun 227:7 vuschs. Davart las duas fatschentas vegn anc decidì a l’urna. La votaziun ha lieu ils 10 da schaner 2016 en la nova vischnanca Surses, che cumpiglia nov fracziuns.

Las lavurs da construcziun duain cumenzar anc l’onn 2016, è vegnì communitgà a la radunanza communala constitutiva da glindesdi saira. L’entir project Viols al Lai Barnagn vegn budgetà cun 106 milliuns francs. I duai vegnir construì in bogn, in hotel ed abitaziuns da vacanzas administradas. Tar ils investurs principals tutgan interpresas da l’Engalterra, da l’Austria, da la Frantscha, l’Austria, la Germania e da la Svizra.

RR novitads 06:00