Sco quai che Franco Poltera scriva en ina brev da lecturs en la Pagina da Surmeir, haja el inoltrà sia demissiun pervia da «decisiuns illegalas» aifer la cumissiun da construcziun. Suenter la seduta dals 11 d’avust haja el constatà cun grond smirvegl, ch’il president da la cumissiun da construcziun e commember da la suprastanza da Surses, dettia dapli paisa a la pressiun economica, che da resguardar la lescha da construcziun.
Uschia saja vegnì publitgà in project, malgrà che quel na correspundia betg a la lescha da construcziun. Tenor retschertgas da RTR sa tracti dal il project da las pendicularas, che vulan construir abitaziuns da persunal tar la staziun da val da l’anteriura pendiculara Savognin–Radons.
Il president da la cumissiun da construcziun sco er il president communal da Surses, n’han betg vulì prender posiziun envers las reproschas, cun quai ch’i sa tractia d'ina dumonda da bajegiar che saja anc pendenta.