Siglir tar il cuntegn

Header

audio
Concessiun da l'ovra en Surses scada e duai vegnir renovada
Or da Actualitad dals 26.10.2021.
laschar ir. Durada: 2 minutas 39 Secundas.
cuntegn

Surses Dapli entradas dals tschains d’aua

La radunanza communala da Surses ha decidì, da reglar da nov las concessiuns en connex cun l’ovra electrica vest a Casti, che nizzegia l’aua dals flums Gelgia ed Alvra. Ils tschains d’aua per il Surses èn radund 170’000 francs ad onn. Quai è quasi il dubel da quai ch’i dat cun il contract actual.

Perquai che la concessiun da Casti vest scroda il fanadur da l’auter onn, duai dar ina nova concessiun cun las Ovras electricas da Turitg EWZ. Quella duai valair enfin l’onn 2050. La vischnanca da Surses po quintar cun entradas annualas dals tschains d’aua da radund 170’000 francs. Vitiers vegn anc ina summa unica da passa 2,6 milliuns francs en connex cun la scadenza dal contract da concessiun pertutgant l’ovra electrica Casti vest.

audio
Leo Thomann: «I dat circa il dubel da la contribuziun d'enfin uss»
ord RTR Audio dals 26.10.2021.
laschar ir. Durada: 19 Secundas.

Eventualmain datti ina concessiun transitorica

La concessiun nova va en vigur suenter l’approvaziun entras la regenza grischuna. Cun quai ch’igl è da quintar che la concessiun nova na giaja betg anc en vigur ils 2 da fanadur 2022 cura ch’il vegl contract scada, ha la radunanza communala da Surses era decidì davart ina concessiun transitorica, enfin che la nova va definitivamain en vigur.

Votà vegn anc a l'urna

La fatschenta sto anc vegnir approvada a l’urna, e quai ils 28 da november. Davart ils medems contracts (cun autras indemnisaziuns) decida la vischnanca Alvra ils 5 da november.

Qua a Casti vegn producì l'electric or da l'aua che deriva dal Surses e da la val Alvra.
Legenda: Qua a Casti vegn producì l'electric or da l'aua che deriva dal Surses e da la val Alvra. Federico Belotti

Ulteriuras fatschentas

  • La radunanza communala da Surses ha approvà la lescha davart la protecziun da la populaziun. La lescha prevesa tranter auter in servetsch d’avertiment sur sms en il cas d’eveniments.
  • A Luigino Maffei è vegnì lubì d’annular il contract da dretg da bajegiar existent concernent la parcella da dretg da bajegiar nr. 5492 e da cumprar la parcella nr. 5487 d’ina surfatscha da 952 meters quadrat en la zona d’industria Gravas a Cunter per in pretsch da 71’400 francs.
  • Als conjugals Tanja e Sandro Demarmels è vegnì lubì, d’annullar il contract da dretg da bajegiar concernent parcella en dretg da bajegiar nr. 8277 e da cumprar la parcella correspundenta nr. 8266, Davos-Clavo, Salouf, cun ina surfatscha da 469 meters quadrat, per il pretsch da 37’520 francs.

Ord l'archiv

Cas da scadenza da concessiun en il Grischun:

RTR novitads 06:00

Artitgels legids il pli savens