Siglir tar il cuntegn

Grischun Central Surses: Approvà tut ils credits e fixà pe da taglia

L’emprima radunanza communala da Surses ha approvà il preventiv dal quint current. El prevesa in surpli d’entradas da 10‘809‘850 francs. En quest plus è cumpigliada ina contribuziun da fusiun da 8.4 milliuns francs. Il pe da taglia è vegnì fixà sin 100% da la taglia chantunala simpla.

Parsonz
Legenda: Davent da Parsonz (foto) a Tigignas vegn sanada la via. RTR, F. Belotti

Ultra da quai ha la radunanza communala approvà il preventiv d’investiziuns per l’onn current. Igl èn previsas investiziuns bruttas da 9’585’000 francs cun entradas da 6’907’050 francs. Uschia sa resultan investiziuns nettas da 2’677’950 francs.

Differentas investiziuns e cumpra da terren

Plinavant ha il suveran da Surses approvà las suandantas investiziuns: 462’000 francs per la sanaziun da la via Parsonz – Tigignas, 397’000 francs per la sanaziun da la via chantunala Rona Soura, 270’000 francs per ina nova staziun da trafo Sur Meir a Cunter, 316’000 francs per il spustament da lingias d’electric ed aua Barnagn/Viols a Savognin, e 320’000 francs per la cumpra d’in vehichel forestal per trair laina. Plinavant ha la radunanza communala decidì, da cumprar da las Pendicularas da Savognin la parcella 3388 a Sot Spondas, Savognin. Las pendicularas investeschan ils daners per novs chanuns da naiv tranter Tigignas e Somtgant. Approvà è era vegnì il reglament da taxas per la procedura da las lubientschas da bajegiar da la vischnanca da Surses.