Siglir tar il cuntegn
cuntegn

Grischun Central Stop da bajegiar: Svalitaziun d’immobiglias a Brinzauls

La bova da Brinzauls ha in’influenza sin la valur da las immobiglias. Sco quai che Romano Kunz, il manader da l’Uffizi da stimaziun dal Grischun di vegnia il stop da bajegiar ch’è vegnì ordinà per Brinzauls resguardà en las taxaziuns novas.

Legenda: Guardar il video Brinzauls - stop da bajegiar. Durada 03:29 minutas.
Or da Telesguard dals 22.05.2017.

Per quant che la valur d’ina immobiglia vegnia svalitada saja impussibel da dir il mument, cunquai ch’i manchian valurs d’experientscha. Pir suenter in per midadas da maun saja pussaivel da valitar l’influenza dal stop da bajegiar sin las valurs da las immobiglias, uschia Romano Kunz.

Naginas premias pli autas

Sin las premias da l’assicuranza d’edifizis dal Grischun n’ha il stop da bajegiar nagina influenza. I na dat naginas premias pli autas per lieus che sa chattan en ina zona cotschna sin la carta da privels.

Venderdi saira ha l’Uffizi da guaud e privels da natira infurmà la populaziun, ch’i vala stop da bajegiar per ils proxims dus onns pervi dal terren a Brinzauls che sa mova dapli che 50 centimeters per onn.

RR actualitad 12:00+