Siglir tar il cuntegn

Header

Ils dus novs commembers da la suprastanza SRG.R ed il president: Roger Tuor, Elena Luzio e Vincent Augustin
Legenda: Ils dus novs commembers da la suprastanza SRG.R ed il president: Roger Tuor, Elena Luzio e Vincent Augustin MAD
cuntegn

SRG SSR Svizra Rumantscha Novs commembers e commembras per ils gremis SRG.R

Durant la radunanza generala da la SRG SSR Svizra Rumantscha ad Andeer è vegnida elegida la nova suprastanza per il temp d’uffizi 2021-2024. Vincent Augustin da Mon è vegnì confermà sco president.

La suprastanza sa cumpona da nov da Gion Lechmann (fin ussa), Ladina Simonelli-Zisler (fin ussa), Elena Luzio (nov) e Roger Tuor (nov). Presidenta dal cussegl dal public daventa Carmen Dedual.

En il center da las fatschentas statutaras da la radunanza generala dals 10 d’october ad Andeer èn stadas las elecziuns. Ultra da la suprastanza èn era vegnidas elegidas las commembras ed ils commembers dal Cussegl dal public e dal Cussegl regiunal. Als commembers partents ha la radunanza generala engrazià per lur grond engaschi. In engraziament spezial per la lavur prestada ha il president Vincent Augustin drizzà a la vicepresidenta Beatrice Baselgia ed al suprastant Donat Nay. Omadus mettan a disposiziun lur posts suenter 12 onns pervi da limitaziun dal temp d’uffizi.

Roger Tuor ed Elena Luzio èn da nov en la suprastanza SRG.R

Il president partent e la nova presidenta dal cussegl dal public, Roger Tuor e Carmen Dedual.
Legenda: Il president partent e la nova presidenta dal cussegl dal public, Roger Tuor e Carmen Dedual. MAD

Er Roger Tuor da Mustér ha mess a disposiziun ses post sco president dal Cussegl dal public SRG.R suenter esser stà 12 onns en quest gremi, ils ultims 4 onns sco president. El è vegnì elegì da nov en la suprastanza da la SRG.R, ensemen cun Elena Luzio da Berna. Omadus entran en uffizi l’emprim da schaner 2021. A Roger Tuor suonda Carmen Dedual da Tumegl, ch’è stada vicepresidenta dal Cussegl dal public ils ultims 4 onns.

Premi SRG.R va a Tarcisi Hendry

Vincent Augustin, Tarcisi Hendry, undrà cun il Premi SRG.R 2020 ed Ursus Brunold
Legenda: Vincent Augustin, Tarcisi Hendry, undrà cun il Premi SRG.R 2020 ed Ursus Brunold. MAD

Il Premi SRG.R 2020 è vegnì surdà durant la radunanza a Tarcisi Hendry, anteriur scolast e grond promotur da l’archiv cultural Tujetsch. Quai sco reconuschientscha per ses engaschi dapi passa 40 onns per l’archiv cultural Tujetsch ed era per sias activitads sin il champ da la cultura rumantscha. Il premi è dotà cun fr. 8’000.00. Ursus Brunold, l’anteriur archivar chantunal, ha fatg la laudatio, la musica da Mario Pacchioli ha dà il rom musical a la surdada dal premi.

Infurmaziuns davart la SRG SSR Svizra Rumantscha

Textbox aufklappenTextbox zuklappen

La SRG SSR Svizra Rumantscha è ina da las quatter societads purtadras da la SRG SSR. Ella represchenta ils interess da la populaziun rumantscha en il sectur da radio, televisiun e multimedia. Cun sia unitad d’interpresa Radiotelevisiun Svizra Rumantscha (RTR) producescha ella ils programs rumantschs. Il Cussegl dal public procura per in stretg contact tranter las persunas responsablas dal program ed il public. Il Cussegl regiunal ha l’incumbensa da far enconuschent e francar la SRG.R en la populaziun rumantscha.
Dapli sut www.srgr.ch, il link avra en ina nova fanestra.

Per tadlar curt e cumpact:

RTR novitads 15:00

Artitgels legids il pli savens

Scrollar a sanestra Scrollar a dretga