Siglir tar il cuntegn

Grischun Central Spleia: Augment dal chapital d’aczias fa naufragi

Il november da l’onn passà ha la radunanza generala da las Pendicularas Spleia-Tambo SA decidì in segund augment dal chapital d’aczias cun ina limita da 1,7 milliuns francs. Il termin da subscripziun è scadì, e las pendicularas n’èn betg cuntentas cun il resultat.

Da san.: Ivo Frei, Franco Quinter (president Tambo SA) e Renato Mengelt (president communal Spleia) dal cussegl d'administraziun da la Spleia Tambo SA.
Legenda: Da san.: Ivo Frei, Franco Quinter (president Tambo SA) e Renato Mengelt (president communal Spleia) dal cussegl d'administraziun da la Spleia Tambo SA. RTR, Federico Belotti

Radund 167’000 francs ha l’augment dal chapital d’aczias purtà, cun in minimum da 400’000 francs avess il cussegl d’administraziun da las Pendicularas da Spleia Tambo SA quintà. Sco quai che Franco Quinter, il president dal cussegl d’administraziun vegn cità en ina communicaziun a las medias saja el surstà, ch’i na vegnia betg investì dapli daners surtut or da la regiun.

I dovra novs investurs

Per pudair purtar enavant l’interpresa sajan ussa necessaris daners d’ordaifer la regiun. Ins dovria ussa nov chapital d’aczias ed investiturs d’ordaifer la val. Quai munta tenor Franco Quinter, che las vischnancas stuessan dar giu lur maioritad da las aczias, sch’ins veglia avair success en l’avegnir.

Ils proxims pass èn ussa da far in’augment dal chapital d’aczias avert, nua che betg mo acziunaris actuals pon sa participar. Cura che quest augment dal chapital d’aczias duai succeder, n’è dentant anc betg definì.

RR novitads 12:00