Siglir tar il cuntegn

Header

cuntegn

Spleia A13 duai ir sut terra

In comité d’acziun vul che l’autostrada A13 a Spleia vegnia manada sut terra empè da sco ussa en il liber. Tenor il chantun fiss quai en general pussaivel. Er la vischnanca da Valragn va d’accord e beneventass in tunnel. Ella vesa dentant pitschnas schanzas per in tal project.

L’Uffizi federal da vias ASTRA planisescha da sanar radund 500 meters da l’autostrada che passa tras Spleia. Cunter quest project ha Christian Mengelt dal comité d’iniziativa Rheinwald fatg recurs.

Betg impussibel da realisar

L’Uffizi da construcziun bassa dal Grischun ha fatg in studi che demussa, ch’i fiss en general pussaivel da sbassar l’autostrada e da manar quella da nov sut terra. Era la passascha neuralgica tar il Volg e la chascharia saja schliabla, per distgargiar la zona da cumpra.

audio
Spleia: Comité d'acziun vul la A13 sut terra
ord Actualitad dals 05.01.2021.
laschar ir. Durada: 3 minutas 12 Secundas.

Passascha privlusa

Actualmain passa l’entir traffic tras Spleia tras la zona da cumpra, in trottuar na datti betg. La vischnanca da Valragn ha elavurà in concept da traffic cun tschintg variantas. Quellas piglian era resguard sin il Hüscherabach ch’ha laschà enavos gronds donns il 2019 pervi d’aua gronda.

Anc quest enviern duain las variantas vegnir preschentadas a las votantas e votants. Quels duain era pudair far ina decisiun da princip, co agir vinavant. In project da metter sut terra l’autostrada fiss in project a lunga vista, scriva la vischnanca sin sia pagina d’internet. La realisaziun d’in tal project saja grev, cun quai ch’i dettia en Svizra blers giavischs per sviaments e tunnels. Da realisar in tunnel per l’A13 a Spleia cuzzass franc 25 fin 40 onns, quinta la vischnanca da Valragn.

Astra vul sanar la A13

Sin dumonda da RTR ha l'Uffizi federal da vias ditg, ch'els veglian en mintga cas realisar lur project da sanaziun a Spleia. Quai uschè spert, ch'il recurs saja giud maisa. Lura veglian ins subit planisar e surdar las lavurs. En tut veglia l'ASTRA investir radund 80 milliuns francs, quai che cumpiglia er paraids da protecziun cunter la canera.

Artitgels legids il pli savens