Siglir tar il cuntegn

Grischun Central Skizza da Giovanni Segantini vegn examinada

Durant blers onns è ina skizza da Giovanni Segantini stada deponida nunobservada en in tschaler a Savognin. Per la festa Segantini ils 17 e 18 da settember ins ha piglià natiers ella. La vischnanca da Surses vul laschar examinar scientificamain il document e laschar stimar la valita.

Ina skizza da la baselgia Nossadonnna a Savognin ch'è probabla da Giovanni Segantini.
Legenda: È questa skizza propi da Giovanni Segantini? mad

Blers da Savognin han gia sentì da la skizza e da sia istorgia. Giovanni Segantini ha vivì ils onns 1886 enfin 1894 a Savognin e haja da lez temp offrì da restructurar la fatschada da la baselgia da Nossadonna - quai gratuitamain sco renconuschientscha per l'ospitalitad e curtaschia retschetta. Quels da Savognin hajan però refusà la purschida perquai ch’i avevian tema d’avair da surpigliar ils custs per la colur. Cun questa decisiun han els desistì ad in’ovra ch’avess oz ina valita nunpajabla, scriva la vischnanca da Surses en ina communicaziun.

È questa skizza propi da Giovanni Segantini?
Legenda: La skizza vegn ussa examinada scientificamain. mad

Skizza è vegnida chattada en in tschaler

I exista davairas ina skizza che demussa il portal d’entrada da la baselgia da Nossadonna restructurà. Quella skizza è vegnida chattada giun tschaler sut la sala Segantini a Savognin, tranter autras utensils, a chaschun da retschertgas per la festa da Segantini. Igl è però betg cumprovà dal tuttafatg sch’il sboz è propi vegnì elavurà da Giovanni Segantini. Sulettamain ina notizia scritta a maun dad in C. Peterelli sin la skizza remartga, che quella saja vegnida stgaffida „digl pictour Segantini igl anviern 1889“. En in protocol da la vischnanca Savognin or da l’onn 1889 stat plinavant l’indicaziun ch’il „pictour Segantino“ (sic!) haja survegnì en rabat da 15 francs sin la laina dad arder. Quai per avair furnì gratuitamain in plan per colurar la fatschada vers nord da la baselgia da Nossadonna.

Beat Stutzer fa examinaziun scientifica

Per tut l’auter na datti però nagins mussaments. Perquai vul la vischnanca da Surses ussa laschar sclerir la chaussa. El ha incumbensà Beat Stutzer, il conservatur dal museum da Segantini a San Murezzan, da far ina examinaziun scientifica dal document. Quella duess mussar sche la skizza è propi vegnida stgaffida da Segantini, tge valita ch’ella ha e tge mesiras da conservar ch’i dovra per la mantegnair. „Sche la skizza è veritabla, fiss ella sco «art en construcziun», la suletta ovra da Segantini cun ena relaziun evidenta cun Savognin“, di Stutzer.

Exposiziun a la festa Segantini

In replicat da la skizza vegn mussà dumengia ils 18 da settember avant la baselgia da Nossadonna a Savognin. Ella furma ina part da la runda da la festa Segantini, durant la quala il Parc Ela lascha reviver puspè en 20 lieus originals la vita e la lavur da Segantini cun citats, istorgias, maletgs e fotografias.