Siglir tar il cuntegn
Inhalt

Grischun Central Scuntrada Savognin ha 64 expositurs

64 expositurs èn s’annunziads a la trentavla Scuntrada sin il stradun da Savognin. Sco quai che Roberto Guetg da l’Uniun da mastirants e commers Surses ha ditg, hajan ins ditg betg pli gì tants expositurs.

La Scuntrada 2014 sin il stradun da Savognin.
Legenda: Or da l'archiv: La Scuntrada 2014 sin il stradun da Savognin. RTR, F. Belotti

Ils davos onns sa focusava la Scuntrada sin expositurs indigens – expositurs che na derivavan betg dal Surses na pudevan betg esser preschents. Ussa è la fiera puspè libra a tuts, quai cun ina exepziun: «Sch'expositurs na concurrenzeschan betg las firmas localas, alura pon era expositurs dad autras regiuns u chantuns avair in stan a la Scuntrada», ha ditg Roberto Guetg.

La Scuntrada duai quest onn era vegnir pli attractiva per ils uffants, quai cun avair scooters electrics, in chastè cun trampolin e la pussaivladad da sa laschar smincar. Sco higlight saja preschent il bov Elvis da Giatgen Arpagaus – il bov ch’ha era ina rolla en il film da Heidi che vegn il december en ils kinos. La Scuntrada è venderdi, ils set d'avust a partir da mezdi.