Il fatg che la vischnanca da Bravuogn ha votà il glindesdi saira sur d’ina lescha che scumonda da far fotografias, mussia che quai saja manegià serius. Uschia han argumentà ils turistichers Marc-Andrea Barandun e Roland Signer. L’auter fatg è, che Grischun vacanzas e Bravuogn Filisur turissem han cusseglià da far quella lescha. Quai mussa ch’i savess senz’auter esser be in’acziun da reclama. Els hajan sclerì il fatg giuridicamain. Quai ha ditg Marc-Andrea Barandun envers RTR.
Giuridicamain betg pussibel
Tenor Giusep Nay, l’anteriur president dal Tribunal federal, sappian ins betg introducir in tal scumond, perquai che quel cuntradia a las libertads persunalas ch’èn francadas en la constituziun. Plinavant di Nay, ch’ins na savessi betg far pajar in chasti, perquai ch’ina persuna fa fotografias. La cuntrada appartegna a la publicitad, ed i fa betg donn a quella da vegnir fotografada. Ord quella raschun è in tal scumond betg commensurà.
Tavlas che fan attend al scumond
Gia mardi damaun duain vegnir montadas tavlas che fan attent al scumond, ha ditg Peter Nicolay, il president communal da Bravuogn. Las fotografias da Bravuogn che vegnan publitgadas en las raits socialas fetschian vegnir trists tut quels che na possian betg esser qua, tge che la vischnanca veglia evitar.
I dat excepziuns
Tgi che cuntrafa a la nova lescha duai vegnir punì cun tschintg francs, la controlla fa in servetsch da segirtad privat.
Betg scumandà èsi da far fotografias or dal tren, e per giavischs spezials sco per exempel staziuns da televisiun che vulan far in film, fa la vischnanca sin dumonda excepziuns.
