Siglir tar il cuntegn
Inhalt

Grischun Central Scumond da bajegiar a Brinzauls

La costa da Brinzauls glischna dapli che 50 centimeters per onn. Ils moviments sajan onn per onn s’augmentads dapi il 2010, ha ditg Andri Largiadèr da l'Uffizi da guaud e privels da la natira. Sco consequenza vegn ordinà en prest in scumond da bajegiar per l'entir vitg abità.

Il privel da crudada da crappa a Brinzauls daventa adina pli grond.
Legenda: Il privel da crudada da crappa a Brinzauls daventa adina pli grond. RTR, Federico Belotti

L’Uffizi da guaud e privels da natira recumonda, che la carta dal chantun che valitescha las zonas da privel defineschia l’entir vitg da Brinzauls sco zona cotschna, quai cun excepziun da Vazarouls.

Sco proxim vegn la cumissiun da privels a relaschar la zona da privels cotschna e la planisaziun locala vegn adattada. Per ils abitants datti ina procedura da participaziun.

Problem vegl

Gia dapi l’onn 1878 è la costa davant Brinzauls en moviment. Suenter il 2000 ha il chantun documentà in augment dals moviments da la crappa. Avant in per onns ha l’Uffizi da guaud e privels da natira laschà bajegiar rempars che tegnan si la crappa che croda vers la via chantunala che passa la zona da privel.

Legende: Video Impressiuns da la bova da Brinzauls abspielen. Laufzeit 00:58 Minuten.
Or da RTR dals 19.05.2017.

Bain han ils moviments da dapli che 50 centimeters per onn gia fatg blers donns a las chasas da Brinzauls, il bajegiar en il vitg è dentant stà pussaivel cun intginas restricziuns.

Quai sa mida ussa: Dapi in mais na po la vischnanca Alvra approvar naginas lubientschas da bajegiar pli en prest l’entir territori da la fracziun Brinzauls. Quai vala era per il cas sch’ina chasa avess da vegnir destruida entras in brischament.

Co franar ils moviments?

Quest atun vul l’Uffizi da guaud e privels da natira examinar, tge pussaivladads ch’i dess per franar las activitads en la muntogna. Tenor Andri Largiadèr datti pussaivladads da construcziun da franar las activitads en la muntogna. Ina pussaivladad pudess esser da far in tunnel che tira ora l’aua or da la muntogna. Quai pretendess però investiziuns da blers milliuns. Cun in resultat da las mesiraziuns è da quintar entaifer dus onns.

In'ampla per dapli segirtad

Per far pli segira la via chantunala, vegn l'Uffizi da guaud e privels da natira gia quest atun ad installar in'ampla, che va sin cotschen cura ch'i dat crudada da crappa en la muntogna.

RR novitads 06:00