Siglir tar il cuntegn
Inhalt

Grischun Central Schubregiar lieus da delicts sco professiun

L’anteriura policista Corina Dietsch ha fundà la firma «Tatortreinigung Dietsch GmbH» cun sedia a Casti en Val d’Alvra. En acziun vegn ella surtut en lieus, nua ch’igl ha dà delicts u accidents cun mortoris. En il Grischun è quai l’emprima firma cun ina tala purschida.

Corina Dietsch davant ses novs vehichels da lavur.
Legenda: Corina Dietsch davant ses novs vehichels da lavur. RTR, F. Belotti
In char annex cun tut ils utensils che Corina Dietsch dovra per sia lavur.
Legenda: Tut il material necessari per neutralisar lieus nua ch'igl ha dà baras sa chatta en in char annex. RTR, F. Belotti

Ils davos onns ha Corina Dietsch lavurà sco policista tar la Polizia chantunala. Questa lavur haja plaschì ad ella, ma insatge mancava ad ella.

Sco ella di da sasezza haja ella in sindrom da gidar: «Jau sai che schubregiar lieus nua ch’igl ha dà mortoris n’è betg ina lavur che tuts pon far, e cun quai ch'jau sai che jau pos ir enturn bain cun talas situaziuns, crai jau d’esser la dretga persuna per ina tala lavur». Ella spera da pudair gidar blera glieud cun sia nova purschida. Sin giavisch schubregia ella era abitaziuns che vegnivan abitadas da uschenumnads «messies». Quai è glieud che lascha enavos in grond dischurden en l’abitaziun.

Pauca concurrenza

Cun quai ch’i dat en Svizra mo paucas firmas che schubregian lieus da delicts, spera ella da survegnir avunda lavur ch’i basta per viver.

Ses radius da lavur n’è betg restrenschì mo sin il Grischun Central, ella po vegnir clamada er per lavurs en direcziun Son Gagl e vers il Tessin. Corina Dietsch spera da survegnir almain dus enfin trais cas al mais.

RR actualitad 08:00