Il töf da naiv cun char annex per transports da persunas e bagascha na correspundeva betg a la lescha. Perquai haja la polizia intervegnì, conferma il post da medias da la polizia chantunala envers RTR. Oliver Bühler, il gestiunari dal servetsch da taxi cun il num Snoxi, ha ditg ch’el saja en contact cun l’uffizi per il traffic sin via, ch’è responsabel per l’immatriculaziun dal töf ed il char annex.
I dettia in problem cun la paisa maximala en connex cun il transport da persunas sin il char annex. Cun mesiras tecnicas duess quel problem vegnir schlià. Bühler spera da pudair reglar tut fitg spert, uschia ch’il servetsch da taxi sin la naiv tranter Tigignas e Radons possia puspè vegnir mess en funcziun sin l’entschatta da las vacanzas da sport.