Enrico Uffer quinta dentant ch’il plan da termin dad avrir l'hotel la primavaira da l’auter onn saja realistic. Cun la furniziun da rauba funcziunia tut bain il mument, ed era producir ils elements en la halla da producziun Padnal a Savognin funcziunia bain. Ins haja dentant adattà las uras da lavur, uschia ch'ils lavurers entschaivian gia la damaun a las tschintg e lavurian enfin las diesch la saira, quai en dus servetschs empè mo dad in. Uschia possian ins lavurar tenor las reglas da «social distancing», ha ditg Uffer. Lavur curta na saja il mument nagin tema en fatschenta cunquai ch’i dovria blera glieud per construir l’hotel nov che custa radund 15 milliuns francs. Quitads fa Enrico Uffer dentant per l’avegnir, el quinta che bleras incumbensas futuras pudessan vegnir annulladas pervi dal coronavirus.
